Mwayen Oryan
Yon Nouvo Seri Eksplozyon Frape Liban
Plizyè eksplozyon sote Mèkredi nan lye kote yo tap chante fineray 3 manm Hezbollah ak yon timoun ki mouri nan eksplozyon "biper" ki te fèt Madi a, dapre sa jounalis Associated Press (AP) ki te sou plas rapòte.
Ministè sante Liban an di omwens yon moun mouri e plis pase 100 lòt blese Mèkredi nan eksplozyon aparèy elektwonik nan plizyè rejyon nan peyi a.
Yon responsab Hezbollah di AP ke "walkie-talkie" gwoup la eksploze e moun te ka tande bri eksplozyon an nan Beiwout.
Responsab la pale sou kondisyon pou non li pa site paske li pat gen otorizasyon pale ak laprès.
Sekrete d Eta Antony Blinken kap vizite Ejipt di Etazini pat o kouran atak la.
"Pa rapò ak Liban, Etazini pa te o kouran ensidan sa yo ni patisipe nan. Nap ranmase enfòmasyon toujou e an jeneral nou di kleman ke li enpòtan pou tout pati yo evite fe okenn bagay ki taka chofe konfli a pi plis alòske nap eseye rezoud konfli Gaza a."
Ajans nouvèl ofisyèl Liban an rapòte tou ke sistèm enèji solè yo te eksploze nan kay nan divès katye Beirout ak nan sid Liban.
Nouvo seri eksplozyon ki frape peyi a lakoz konfizyon ak kolè apre atak ak bonm "biper" yo ki sanble se yon atak konplike Izrayelyen ki vize manm Hezbollah yo.
Pòtpawòl Komisyon Dwa Moun Nasyonzuni, Ravina Shamdasani di atak nan Liban ak Siri yo chokan e ke enpak sou sivil yo pa akseptab.
"Fok gen yon anket endepandan, konplè e transparan sou sikonstans eksplozyon sa yo. Nou dwe trennen devan la jistis, moun ki òdone yo epi egzekite yo."
Eksplozyon yo dewoule yon jou apre sak te sanble yon atak Izrayelyen ki vize "biper" ke Hezbollah itilize. Omwens 12 moun mouri epi prèske 3 mil blese.
Pami viktim yo te gen 2 timoun. Nouvèl yo fè konnen bipè yo sote nan Liban epitou nan Siri.
See all News Updates of the Day
Hezbollah Revandike Nouvo Atak sou Sòlda nan Nò Izrayèl
Hezbollah Libanè a te di byen bonè Jedi li te tire misil sou sòlda Izrayelyen yo nan nò Izrayèl, yon ti tan apre li te revandike responsablite pou yon lòt atak sou sòlda Izrayelyen ki deplwaye nan sid peyi Liban.
Nan yon deklarasyon, mouvman pwo Iranyen an te di li te "vize yon rasanbleman fòs lènmi Izrayelyen nan Sa'sa ak yon latriye misil", yo presize frap la te fèt a 11:50 pm lè lokal Mèkredi (9:50). p.m. GMT).
Lokal sa a sitiye nan nò Izrayèl.
Etazini: Lajitis Akize yon Anplwaye Gouvènman Paske l Divilge Dokiman Sekrè
WASHINGTON (AP) — Yo akize yon nonm ki te travay pou gouvènman ameriken an paske li te divilge enfòmasyon sekrè ki te evalye plan avan Izrayèl l te gen pou atake Iran.
Se sa dokiman ki depoze nan tribinal yo Mèkredi a revele.
FBI te arete mesye a, ki te idantifye kòm Asif William Rahman, semenn sa a nan Kanbòdj e li ta dwe parèt devan tribinal pou premye fwa nan Guam.
Li pa imedyatman klè ki ajans federal ki te anplwaye li.
Dokiman yo te montre Izrayèl la te toujou ap deplase mwayen militè pou fè yon frap an repons a atak misil balistik Iran an nan premye oktòb.
Izrayèl te fè yon atak revanj sou plizyè sit nan Iran nan fen mwa oktòb la.
Etazini te fè yon Frap Kont Sib Iranyen yo nan Peyi Siri
Washington - Lame Ameriken an te di Lendi li te fè atak kont 9 sib ki asosye ak gwoup Iranyen nan Siri.
Nan yon deklarasyon, lame ameriken an te di atak yo te fèt sou 2 kote nan peyi Siri e yo te yon repons a plizyè atak sou pèsonèl ameriken nan peyi Siri nan dènye 24 trèdtan yo.
Etazini te detanzantan fè atak kont sib ki gen rapò ak Iran tou nan Irak ak nan Siri. An fevriye, Etazini te lanse atak ayeryen an Irak ak Siri kont plis pase 85 sib ki gen rapò twoup Gad Revolisyonè Islamik Iran an ak milis li apiye a, kòm revanj pou atak mòtèl sou twoup Ameriken yo.
"Frap sa yo pral afebli kapasite gwoup Iranyen ap apiye yo pou planifye ak lanse atak pi devan sou fòs ameriken ak kowalisyon yo," lame ameriken an te di apre dènye frap yo.
Etazini gen 900 twoup nan Siri ak 2,500 kay vwazen yo Irak, nan yon misyon pou konseye ak ede fòs lokal yo k ap eseye anpeche Eta Islamik retounen, ki an 2014 te akapare yon bon pati nan tou de peyi yo, men yo te rive kraze l an apre.
Etazini voye bato ak avyon lagè nan rejyon an depi konfli Izrayèl ak Hamas te eklate nan dat 7 oktòb 2023, pou eseye dekouraje Iran ak gwoup ki apiye Iran patisipe nan konfli a.
Fòs Ameriken yo te ede tou tire pou kraze pwojektil Iran te lanse nan direksyon Izrayèl ane sa a.
Hamas Mande Peyi Arab ak Mizilman yo pou Fòse Izrayèl Sispann ak "Agresyon" li
Mouvman Islamis Palestinyen Hamas la te mande peyi Arab ak Mizilman yo pou yo aplike deklarasyon yo te fè menm jou pandan somè yo nan Riyad pou fòse Izrayèl sispann "agresyon" l yo.
Hamas te ekri "Afimasyon dwa nasyonal pèp nou an, premye ladan yo se kreyasyon yon eta Palestinyen endepandan ak Jerizalèm kòm kapital li, mande efò rapid ak solisyon pratik pou fòse (Izrayèl) sispann agresyon li ak jenosid kont pèp nou an, ”
Fanatik Futbòl Izrayelyen Sibi Atak nan Amsterdam
Otorite Olandè yo deklare jèn jan ki tap sikile sou scooter atake fanatik Izrayelyen lanuit la apre yon match foutbòl nan Amsterdam. Sanble atak sa yo dewoule apre apèl ki pibliye sou rezo sosyal yo ki mande pou yo sible Juif yo.
Facebook Forum