Venezyela
Kou Siprèm Venezyela Pral Fè Odit Rezilta Eleksyon Prezidansyèl la
Kou Siprèm Venezyela aksepte demann Prezidan Nicolas Maduro fè pou mennen yon odit sou rezilta eleksyon Dimanch la. Tribinal la pase lod bay misye, Edmundo Gonzalez ak 8 lòt kandida ki te patisipe nan eleksyon prezidansyèl la pou yo konparèt devan jij yo jodi Vandredi a.
Caryslia Beatriz Rodriguez se prezidan Kou Siprèm Venezyela.
"Pwosesis envestigasyon ak verifikasyon pou sètifye san restriksyon rezilta pwosesis elektoral ki te dewoule 29 Jiyè 2024 jan prezidan konstitisyonèl Repiblik Venezyela Nicola Maduro Moros mande a aksepte e enskri."
Mèkredi, Maduro te mande tribinal siperyè a poul fè odit rezilta eleksyon an men demann sa a te soulve kritik tòp top bò kote obsèvatè etranje ki te di tribinal la twò kòkòt ak figawo ak gouvènman an pou l mennen yon ankèt endepandan.
Li poko klè si premye konsesyon Maduro a pou gen plis transparans, se rezilta chita tande li te genyen ak Brezil, Kolonbi ak Meksik.
Kèk minit anvan anons Kou Siprèm nan, Maduro te parèt devan yon foul depi balkon palè prezidansyèl la kote li bat bravo pou desizyon tribinal la epi di lap reponn prezan Vandredi.
Maduro reafime tou menas kont manifestan yo e li mande patizan li yo f è gouvenman an konnen sa yap fè pou yo ka chache yo "ri pa ri" "katye pa katye".
Gouvenman Maduro a ap sereboulon manifestasyon ki te deklanche Lendi apre opozisyon an te kriye koken epi di li gen prev Maduro pedi.
Lide opozisyon Maria Corina Machado pibliye yon videyo sou rezo sosyal yo kote li mande patizan li yo rasanble nan lari Samdi pou "rann omaj ak tout ewo ki te defann volonte pep Venezyelyen an 28 Jiye."
"Nou pral afime verite a paske mond lan pral we fòs ak deteminasyon yon sosyete ki detemine pou l viv nan libete."
See all News Updates of the Day
Otorite Venezyelyen yo Fouke yon 4yèm Ameriken
Venezyela : yon 4yèm Ameriken jwenn arestasyon l nan Karakas pou konplo pou "asasinen" Prezidan Nicolas Maduro, dapre otorite yo, ki denonse "entèferans" Inyon Ewopeyen ak Espay nan zafè sa a. Jeanty Augustin Junior Gen
Venezyela: Washington, Madrid ak Prag Mande Enfòmasyon sou Sitwayen yo Arete yo
Washington, Madrid ak Prag ap mande enfòmasyon sou sitwayen peyi yo ke otorite Venezyela te fouke, anba akizasyon ke yo lye ak yon swadizan konplo ki vize "destabilize" peyi a.
Otorite Venezyelyen yo te anonse samdi arestasyon 3 Ameriken, 2 Espanyòl ak yon Tchèk, yo di te sezi anviwon 400 fizi ki soti Ozetazini.
Minis Enteryè Venezyelyen an Diosdado Cabello te di ke sispè sa yo fè pati de yon swadizan konplo ki gen entansyon "jenere vyolans" ak "destabilize" peyi a.
Dapre li, plan an te vize Prezidan Nicolas Maduro, ke opozisyon an ak yon pati nan kominote entènasyonal la konteste re-eleksyon li.
Washington ak Madrid demanti patisipasyon yo nan yon operasyon konsa a.
Anplis de sa, Minis Enteryè Venezyelyen an te deklare ke yon ofisye aktyel lame ameriken an, Wilbert Castañeda, te pami moun ki te te jwenn arestasyon yo.
Mesye Cabello te idantifye 2 lòt Ameriken yo kòm David Estrella ak Aaron Barren Logan ak Espanyòl yo kòm José María Basoa ak Andrés Martínez Adasme.
Mesye sa yo swadizan lye ak ajans entèlijans Ameriken ak Panyòl, sa ke gouvènman peyi yo demanti.
Venezyela di li Fouke 6 Etranje
Minis Enteryè Venezyelyen, Diosdado Cabello, akize Espay kòmkwa li planifye pou l bay "mèsenè" pou yon operasyon kont gouvènman an, operasyon ke Etazini ap dirije nan Venezyela. Jeanty Augustin Junior Gen detay.
Venezyela Arete 3 Ameriken, 2 Panyòl ak yon Tchek ke yo Akize yo de Konplo kont Leta
Otorite Venezyelyen yo fouke 3 Ameriken, 2 panyòl ak yon Tchek, yo akize de yo konplo ki te swadizan vize "destabilize" peyi a.
Caracas te fè arestasyon an Samdi 14 septanm nan, yo tou rapòte ke sezi apreprè 400 fizi ki soti Ozetazini.
Washington, ki gen relasyon ak Caracas ki ap deteryore, imedyatman demanti nenpòt "patisipasyon" Ameriken nan yon "konplo" ki vize "ranvèse" Prezidan Nicolas Maduro.
Espay fe menmpan pareyman li "kategorikman demanti ak rejte" akizasyon otorite venezuelyen yo ki afime ke li ta "ki enplike nan yon operasyon destabilizasyon politik".
Minis Enteryè Venezyelyen an, Diosdado Cabello, te pale nan yon konferans pou laprès sou yon swadizan plan ki gen entansyon "jenere vyolans" ak "destabilize" peyi a.
Dapre li, Prezidan Maduro, ke opozisyon an ak yon pati nan kominote entènasyonal konteste vitwa li nan eleksyon 28 jiyè a, se te sib swadizan atak sa , dapre otorite yo gen lòt ofisyèl egzekitif ki te sib tou .
Mesye Cabello di "2 sitwayen Panyòl te fèk jwenn arestasyon yo nan Puerto Ayacucho (sid)," e li ajoute ke yon "sitwayen Ameriken" te nan prizon tou.
Apre sa, li rapòte arestasyon 2 lòt Ameriken, ansanm ak yon Tchek.
Misye Cabello te lye swadizan plan an ak sèvis entèlijans Panyòl ak Ameriken, ansanm ak lidè opozisyon an Maria Corina Machado.
Venezyela-Espay: Minis Zafè Etranjè a Deklare “Venezyela Pap Aksepte Okenn Enjerans"
Yvan Gil ki se Minis Afè Etranjè peyi Venezyela di Vandredi peyi l 'pa aksepte "oken enjerans" nan men Espay, ki te bay kandida opozisyon an azil politik apre defèt li nan eleksyon prezidansyèl Jiyè a.
Mesye Gil te fè deklarasyon sa yo apre yon rankont ak anbasadè Panyòl la apre yo te konvoke li.
Li kontinye poul di "Nou pa pral aksepte okenn enjerans nan men gouvènman Panyòl la nan zafè ki tonbe anba jiridiksyon eksklizif Venezyelyen yo".
Yvan Gil te raple tou anbasadè Venezyelyen an nan Espay semèn pase a pou konsiltasyon.
Facebook Forum