Fòs Defans Izrayèl yo (FDI) anonse revokasyon jodia 2 ofisye pou enplikasyon yo nan frap aeryen ki te touye 7 travayè sekou semenn sa a nan Gaza.
Nan yon deklarasyon ki anonse finisman ankèt sou ensidan Premye Avril la, FDI di ke yon kòmandan brigad ki se yon majò nan FDI, ak chef pèsonèl yon brigad, ki se yon kolonèl branch rezèvis, ap jwenn revokasyon yo.
Yon kòmandan brigad, yon kòmandan divizyon ak yon chef nan kòmandman santral la, yo tout resevwa lèt reprimand.
Deklarasyon FDI a di ke ofisye ki te anchaje frap la te mal idantifye 3 machin Kwizin Santral Mondyal lè yo kwè ke yon nèg ame Hamas te kache nan kamyon yo.
Rapò a di tou: “Frap sou 3 machin yo sete vyolasyon grav kont lòd yo ak Regleman ki gouvène Operasyon FDI.”
Anons Izrayèl la vini apre yon kout telefòn chofe ant Netanyahu ak Prezidan Etazini Joe Biden ayè vandredi a.
Biden te di Premye-minis Izraelyen an ke pou li kontinye sipòte lagè Izrael kont Hamas la, fòk li wè mezi Izrael pran pou pwoteje sivil palestinyen nan Gaza ak pwoteksyon ke li bay travayè imanitè ki ap pote manje pou yo.
