Nan yon entèvyou ak Jacquelin Belizaire, Mèt Emmanuel Jeanty di li te wè epi salye Guy Philippe nan ayewopò entènasyonal Toussaint Louverture a Jedi maten (30 Novanm) 2023 a, yon ti tan apre li te rive Ayiti, men li pat jwenn pèmisyon pou pale avè l.
"Yo (lapolis) pa resevwa nou... e lè nou mande si nou te ka asiste si y ap poze l dè kestyon, yo te di nou non yo pap kapab pèmèt sa, se inikman dè kestyon ki regade administrasyon, dè bagay administratif ke yap regle," se sa mèt la di VOA.
Dapre avoka a, lapolis ki te akonpaye kliyan li di l li kapab petèt gen aksè a Guy Philippe Vandredi (1 Desanm).
Pou kounyea misye nan men DCPJ (Direksyon Santral Lapolis Jidisyè).
Nap raple ke inite lapolis sa a gen ladann detektiv ki mennen ankèt sou krim ki fèt an Ayiti.
Se branch sa a ki kolekte prèv ke lajistis sèvi pou pwouve inosans oubyen kilpabilite yon moun li sispèk ki komèt yon krim.
"Eske lap libere pi ta? m pa konnen, eske se va demen ou apre demen? m pa konnen paske pèsonn avoka pat gen dwa tande kwak se swa sa l ye a," avoka di VOA.
Li ajoute ke gen lòt avoka ki te ale nan ayewopò a tou, ki te oblije kanpe nan lari a, paske yo pat jwenn pèmisyon pou antre nan zòn kote Guy Philippe te ye a.
Mèt Emmanuel Jeanty di entewogasyon Guy Philippe san prezans avoka li se yon vyolasyon konstitisyon Ayiti.
"Atik 25.1 konstitisyon an rezoud pwoblèm sa a depi 1987.
Li di ou paka entewoje yon moun san prezans yon avoka oubyen temwen li chwazi a...Savledi poze kesyon - men pa poze kesyon pou poze kesyon -- savledi poze kesyon nan sousi pou jwenn yon repons."
Avoka a pa di kisa li gen entansyon fè kòm suivi. Men li fè konnen li te rankontre lòt avoka ki te rasanble nan ayewopò a pou diskite sou yon strateji.
VOA Kreyòl te pran kontak ak pòt pawòl PNH la, Gary Desrosiers, pou mande l plis enfòmasyon sou sityasyon Guy Philippe. Nou poko jwenn repons.
Yon pòt pawòl ICE (Immigration and Customs Enforcement - Sèvis Imigrasyon ak La Dwan Etazini) te konfime pou VOA Kreyòl Vandredi 8 Septanm ke li te pran ansyen-Senatè Ayisyen Guy Philippe an chaj apre liberasyon li nan prizon federal Atlanta a.
“31 Oktòb 1999, sitwayen Ayisyen Guy Philippe, 55 an te antre Ozetazini legalman, men li te vyole kondisyon antre li Ozetazini apre yon tribinal te kondane li pou 2 chèf akizasyon pou konplo pou fè blanchiman lajan.
Ajan imigrasyon ak Ladwann ICE te kontre avè l nan prizon Etazini nan Atlanta e yo te pran l an chaj 7 Septanm 2023. ICE pral kenbe li jiskaske li konplete pwosesis imigrasyon li" pòt pawòl la te di VOA.
Philippe te jwenn liberasyon li 7 Septanm, apre li te pase 6 zan nan prizon.
