Mwayen Oryan
Etazini Di Li Pa Apiye yon 'Okipasyon Endefini Izrayelyen nan Gaza'
Lamezonblanch souliyen Madi ke Prezidan Joe Biden pa apiye yon okipasyon Izrayelyen nan Gaza apre fen lagè a.
Deklarasyon sa a souliyen pozisyon administrasyon an yon jou apre Premye Minis Izrayelyen an, Benjamin Netanyahu te di Izrayèl pral gen yon wòl pou jwe nan Gaza pou yo "peryòd tan endefini."
Pòt pawòl Konsey Nasyonal Sekirite Lamezonblanch la, John Kirby te reponn kestyon jounalis yo sou deklarasyon sa a.
"Nou pa apiye lide pou Fòs Defans Izrayèl yo ta re-okipe Gaza. Nou kwè fòk gen yon bon jan konvèsasyon pa rapò ak kisak pral pase Gaza apre lagè a e ki kalite gouvènans kap genyen. Nou absoliman dakò ak tokay Izrayelyen nou yo ke Gaza paka rete jan li te ye 6 Oktòb."
Anvan sa, Prezidan Biden te di se tap yon "erè" pou Izrayèl okipe Gaza.
Nan entèvyou li ak ABC News, Netanyahu te di Izrayèl pral pran responsabilite pou sekirite zòn nan endefiniman paske "tout moun wè sak pase lè nou pa fè sa."
Kirby bò kote pa l eksprime kè sote Etazini genyen pa rapò ak viktim sivil atak Izrayelyen yo sitou timoun yo.
"Sa m ka di w se ke nou kontinye souliyen ak tokay Izrayelyen nou yo ke fòk yo pran prekosyon lè yap fikse sib yo. Se yon bagay ki tris. Li orib pou wè imaj timoun piti ke yap rale soti anba dekonb bilding ki kraze e anpil nan yo pa suviv. Hamas mete timoun sa yo an danje epi fanmi yo an danje tou paske li pa kite yo pati kite Gaza."
Pandansetan, Fòs Defans Izrayelyen an pibliye Mèkredi yon videyo yo di montre enjenyè konba yo ki jwen, ekspoze epi fè sote yon tinèl Hamas nan Gaza.
Fòs Defans la di yo te jwenn tinèl yo pandan yon operasyon nan rejyon no Gaza.
Gen yon pakèt moun ki abite nan rejyon sa a, sitou nan Gaza Siti ki sitye bò kote kan refije yo. Izrayèl fikse rejyon sa a kòm sib nan kanpay lap mennen pou kraze Hamas, ki se gwoup militan ki ap dirije Gaza depi 16 zan.
Lagè a tanmen dezyèm mwa li kounyea. Li te komanse 7 Oktòb apre atak Hamas te lanse kont sid Izrayèl ki te lakoz 1,400 Izrayelyen - sivil pou pi fò - te pèdi lavi yo. Hamas te pran 242 otaj tou.
Ministè Sante Piblik la, ke Hamas dirije deklare gen plis pase 10,500 Palestinyen ki mouri nan lagè a - pami yo gen 4,300 timoun.
Nan Jeruzalèm menm, fanmi zanmi ak moun ki apiye viktim atak Hamas la te rasanble devan palman an Mèkredi pou mande demisyon Premye Minis Netanyahu.
Manifestan yo monte yon tant ki gen drapo Izrayelyen ak foto moun militan Hamas yo te pran an otaj.
Oganizatè manifestayon an pèdi kèk manm fanmi yo nan atak 7 Oktòb la.
" Depi yè nou isit. Objektif nou se desann gouvènman an epi desann Bibi, se pi gwo objektif la. Nou pap sispann toutotan li pa kite pouvwa a. Osi lontan ke li nesesè," òganizate manifestasyon an di AP.
Manifestan Keren ale pi lwen:
"Mwen vini isit pou pote solidarite pou fanmi ki pèdi tout bagay. Gouvènman an pa rive sou yo donk fanmi yo deside al kanpe devan gouvènman an pou mande chanjman. E mwen vle montre mond lan ke gen yon vwa ki gen puisans e ki sonnen klè andedan sosyete Izrayelyèn nan e ki kont gouvènman an."
Ann Itali, Minis Defans la, Guido Crosetto anonse peyi li pral voye yon bato lopital ki va jete lank tou pre kòt Gaza pou ede popilasyon Palestiyèn nan.
Bato Vulcano a sipoze fè vwal ak 170 moun abò li, pami yo pèsonèl medikal e militè e li ekipe ak sal operasyon.
Enfomasyon pou repotaj sa a soti nan Associated Press
See all News Updates of the Day
Hamas Konfime Lanmò Yahya Sinouar
Mouvman Islamis Palestinyen Hamas la konfime Vandredi 18 oktòb la lanmò lidè yo a.
Yahya Sinouar ki te nan tèt gwoup Hamas la jwen n lanmò swit ak yon operasyon militè Izrayèl te fè nan katye kote li te ye nan Band Gaza a.
Khalil al-Hayya, yon ofisyèl nan Hamas ki baze nan Katar, te di nan yon emisyon videyo sou Al Jazeera: "Nou kriye pou lanmò gwo lidè a, frè mati a, Yahya Sinouar, Abu Ibrahim,"
Apre analiz ADN sou kadav la Izrayèl konfime jedi 17 oktòb la ke kadav yo te gen nan men yo a se kadav konbatan Hamas la.
Izrayèl Asasine Chèf Hamas la
Minis Zafè Etranje Izraelyen an, Katz anonse jedi lanmò lidè Hamas Yahya Sinouar, ki te mouri pandan yon operasyon militè nan Gaza.
Medya Ofisyèl Siryen yo Rapòte "Atak" Ayereyen Izrayelyen sou Latakia
Ajans ofisyèl siryen an Sana rapòte lannwit Mèkredi rive Jedi yon atak ayeryen "Izrayèl" te lakòz dife nan vil Latakia, ki twouve l bò lanmè a.
Obsèvatwa Siryen pou Dwa Moun pale de yon frap sou yon "depo zam".
"Defans anti ayeryen an te entèsepte sib enmi sou tèt Latakia," dapre sa ajans Sana a rapòte, li te refere li a "dife ki te kòmanse nan moman atak Izrayelyen" nan papòt vil sa a, bastyon Prezidan Bashar al-Assad, alye Hezbollah Libanè a nan gè kont Izrayèl la.
Obsèvatwa Siryen pou Dwa Moun, bò kote pa l, te rapòte sou X yon "frap Izrayelyen ki vize yon depo zam nan Latakia".
Chèf Diplomasi Izraelyen an Anonse ke Lidè Hamas Yahya Sinouar "Elimine"
Minis Zafè Etranje Izraelyen an, Katz anonse jedi lanmò lidè Hamas Yahya Sinouar, ki te mouri pandan yon operasyon militè nan Gaza.
Lame Izraelyen an "te anonse ke yo ap fè analiz ADN sou kadav ke yo kwè se pa konbatan Hamas" pou yo te kapab konfime ke se te kadav lidè politik mouvman islamis palestinyen Yahya Sinouar,dapre sa yon sous sekirite izrayelyen te di AFP jedi.
Mesye Katz te di nan yon deklarasyon li bay laprès "Ansasen an mas Yahya Sinouar, responsab masak ak atwosite ki te fèt 7 oktòb la, te elimine pa sòlda yo (fòs Izrayelyen yo)."
Izrayèl ap Fè Tès ADN pou Chache Konnen si Li Touye Chèf Hamas la
Lame Izrayelyen an di lap chache konnen si chèf Hamas la, Yahya Sinwar mouri nan yon operasyon militè nan Gaza.
Otorite yo tap fè tès ADN sou yon kadav pou detèminie si se misye, dapre sa yon responsab sekirite Izrayelyen di.
Lame a di nan yon deklarasyon ke 3 militan mouri pandan operasyon Gaza a, san yo pa presize ki kote ni bay okenn lòt detay.
Lame a di idantite 3 moun yo pa konfime, men ke lap "tcheke posibilite" ke youn nan yo se Sinwar.
Nan no Gaza, yon frap ayeryen Izrayelyen sou yon lekòl ki abitre Palestinyen ki kouri kite kay yo touye omwens 15 moun, pami yo 5 timoun, dapre sa Ministè Sante Gaza a di.
Facebook Forum