Donald Trump ak 18 akolit enkilpe nan eta Jòji poutèt jefò yo te lanse pou fè koken nan eleksyon 2020 an. Trump pèdi nan eta sa a.
Ka kriminèl yo anonse Lendi swa, se 4èm enkilpasyon ex-prezidan an e 2èm nan pou mwa sa a kote yo akize l dèske li te eseye ranvèse rezilta eleksyon prezidansyèl 2020 an.
Enkilpasyon an gen ladann detay sou plizyè douzèn zak Trump ak akolit li yo te komèt pou ranvèse defèt li te sibi nan eta enpòtan sa a.
Pami lòt moun lajistis Joji akize, nou jwenn ansyen chèf kabinè Lamezonblanch la, Mark Meadows, avoka pèsonèl Trump la, Rudy Giuliani ak yon responsab depatman Jistis la anba administrasyon Trump la ki rele Jeffrey Clark, ki te ede prezidan an pouse pou pi devan ak jefò li pou ranvèse defèt li nan eleksyon Jòji a.
