Apeprè 69% pami 1,330 moun ki te te patisipe nan sondaj atravè peyi a di ke yo sipòte kreyasyon yon "fòs entènasyonal" - ke gouvènman ayisyen an te mande kominote entènasyonal la.
Sondaj sila te fèt pa Agerca ak konpayi konsiltasyon DDG.
Prèske 80% di ke yo kwè ke polis nasyonal PNH ka bezwen sipò entènasyonal pou rezoud pwoblèm gang ame yo kreye nan peyi, pifò moun di sipò sa ta dwe deplwaye imedyatman.
Nan mwa Oktòb, Nasyonzini te sigjere yon "fòs aksyon rapid" ta dwe ale ann Ayiti pou konbat zak vyolans k ap ogmante e ki lakòz anpil moun mouri, e plizyè plizyè milye sitwayen kouri kite kay yo.
Men, anpil moun te eksprime dout ak enkyetid yo, akoz abi ki te fèt nan moman kote te gen prezans fòs milite etranje nan ane avan yo, sitwayen sa yo tou kesyone demand gouvènman Premye Minis Ariel Henry fè a, akoz peyi a pa gen okenn reprezantan ki te demokratikman eli depi kòmansman mwa janvye 2022 a.
Pifò peyi yo te mefye lide pou yo voye twoup, men peyi Jamayik di li pare pou voye yon fòs an Ayiti pou vin ede rezoud kriz la, El Salvador ofri yon "asistans teknik."
Anvwaye Nasyonzini an Ayiti Helen La Lime mwa pase a te di ke li wè anpil pridans bò kote Etazini ak Kanada, men " yo pa di non yo pap voye yon fòs."
Plis pase yon tyè nan moun ki te patisipe nan sondaj la di depi 2021 ke yo te konnen yon moun nan katye yo, fanmi yo, oswa nan travay yo ki mouri oubyen viktim akoz aktivite kriminel yo.
Plis pase 70% te di ke aktivite yo nan kapital peyi a limite akoz prezans gang yo, 83% te di ke yo te pèdi revni anyel.
Apeprè 36% te di ke yomenm oswa yon moun yo te konnen te viktim de zak kidnaping depi 2021, pandan ke 28% yo konnen yon moun ki sibi atak fizik, gen 9% ki konnen moun ki sibi zak agresyon seksyèl.
Yon ka moun di yo te sispann aktivite sosyal, e yon senkyèm kategori moun di yo te kite kay yo akoz prezans gang yo.
