Etazini elimine youn nan lide gwoup teworis Eta Islamik la.
Prezidan Joe Biden anonse lide gwoup Eta Islamik la mouri nan la Siri, pandan yon operasyon yon fos milite elit Ameriken lanse. Operasyon an ki fet nan nuit nan pwovens Idlib la, dènye pati la Siri ke rebèl yo kontwole, sèvi kom baz pou plizyè chèf gwoup teworis Al-Qaida ak kèk lot militan.
"Ye swa, fos milite Etazini egzekite lod mwen e yo elimine ak sikse yon gwo menas teworis devan mond lan, lide global Eta Islamik le ki pote non Haji Abdullah," Biden anonse.
Biden di tout Ameriken ki te patisipe nan operasyon an retounen sen e sof.
Prezidan an di Abu Ibrahim al Hashimi al Qurayshi mouri menm jan predesese li al Baghdadi te fe, li te sote yon bonm ki te tache sou ko'l pou touye tet li, ak manm fanmi ni - pami yo fanm ak timoun nan moman milite Ameriken yo tap pwoche.
"Sachan teworis sa a te chwazi pou'l mete fanmi ak timoun bo kote'l nou te fe chwa pou se fos elit nou ki lanse atak la --ki se yon pi gwo risk pou nou, olye nou eseye vize li ak yon atak ayeryen. Nou te fe chwa sa a pou minimize viktim sivil yo. Ekip nou ap travay sou rapo a kounyea men nou konnen ke nan moman milite nou yo tap pwoche pou mete men sou li, teworis la nan yon denye zak lach ki montre li pa gen okenn ke sote pou lavi pwop fanmi ni ni nenmpot lot moun, te chwazi pou touye tet li ak yon ves pyeje epi sote 3em etaj kay la ann antye olye li fe fas ak la jistis pou reponn pou krim li komet yo. Manm fanmi ni mouri ave'l menm jan predesese li te fe'l," Biden deklare
Pot pawol Pantagon nan John Kirby di gen 4 timoun yo rive sove nan dezyem etaj la.
"Fos Ameriken yo rale 4 timoun soti nan 2em etaj la apre yo te antre. Donk jefo pou pwoteje inosan yo se pat selman nan komansman sete pandan tout operasyon an," Kirby di lapres.
Operasyon sa fet nan moman Eta Islamik la ap eseye reprann pye nan zon nan. Yo lanse yon seri atak nan rejyon an e mwa pase a yo te sezi yon prizon nan nodes la Siri kote yo te kenbe omwens 3,000 manm gwoup la.
Moun ki rete nan zon nan dekri kout zam ki marye ak eksplozyon ki te lakoz moun vil la, ki sitye tou pre frontye la Tiki te leve.
Jamil El-Deddo rete nan vwazinaj la.
"Ve 1h30 di maten son elikopte te leve nou. Sa fe lontan depi nou pa tande bagay konsa. Moun ki rete nan kan tou pre a te peu paske sa fe'n sonje epok anvan nou te kouri kite kay nou anba rejim Assad la. Donk moun kan an pat re-domi paske nou pat konnen si sete yon atak kowalisyon an ki pa sevi ak bonm yomenm, " li di Associated Press.
Omar Saleh se yon vwazen tou.
"Nou tande yon neg ki gen yon aksan swa Irakyen oubyen Saoudyen ap pale ak yon dam. Li di'l pa rann tet ou. Te gen anpil tantativ konsa pandan elikopte yo tap sivole pandan 45 minit e pesonn pa reponn. Apre sa nou tande kout zam soti nan avyon an epi mwen tande sak sonnen tankou yon parachut," li di AP.
San kouvri yon pati nan sol la nan yon kay ki detwi yon kay nan vil Atmeh, pwovens Idlib nan la Siri, 3 Fevriye 2022.
Kirby konfime twoup Ameriken yo te ankouraje moun yo rann tet yo plizye fwa.
"Nou lanse apel bayo plizye fwa pou ankouraje tout moun andedan an pati e yon ti tan apre operasyon an te komanse Abdullah sote ves la e omwens yon moun te reyaji ak kout zam epi fos Amerikenn nan te antre," Kirby deklare.
Prezidan Biden di le mond debarase ak yon neg mechan.
"Gras ak twoup vanyan Ameriken yo lide teworis terib sa a pa egziste anko," prezidan an deklare.
Jounalis yo mande Kirby si Etazini gen yon ide kiyes ki pral ranplase moun ki mouri a nan tet gwoup la.
"Eben yo san lide jodia. Se yon gwo kou yo pran nou pa kwe Eta Islamik pral reprann ni rapidman apre kou sa a," Kirby reponn.
Sekouris ki t'al sou sen nan apre atak la di gen 13 moun ki mouri, pami yo 6 timoun ak 4 fanm.
Se pa premye fwa fos zame Etazini vize yon lidè wo plase Al-Qaida nan rejyon sa a. Souvan yo depann sou atak ayeryen ak dron pou akonpli misyon an.
Nan mwad Oktob 2019, Fos Espesyal Militè Etazini te patisipe nan yon atak nan Idlib ki te touye ansyen lidè gwoup Eta Islamik la Abu Bakr Al-Baghdadi.
Yon pati nan enfomasyon pou nouvel sa a soti nan Associated Press ak Reuters.
