Ekriven Salman Rushdie sibi yon atak nan moman li tapral bay yon diskou nan Nouyòk. Dapre nouvèl yo, misye pran kout kouto nan kou.
Yon jounalis Associated Press te sou plas nan moman kote yon nèg kouri nan direksyon pis kote ekriven an te kanpe Vandredi nan Enstitisyon Chautauqua a epi komanse pwayade epi bay Rushdie kout pwen.
Ekriven an te tonbe atè epi moun te rive metrize nèg ki te atake'l la.
Liv Rushdie a "Vèsè Satanik" entèdi ann Iran depi 1988, e gen anpil Mizilman ki konsidere'l tankou yon blasfèm.
Yon ane apre piblikasyon li, defen lidè Iranyen, Gran Ayatollah Ruhollah Khomeini te lanse yon fatwa, setadi yon apèl pou moun touye Rushdie. Yo te ofri yon pri plis pase $3 milyon pou nempòt ki moun ki rive touye Rushdie.