Vyolans eklate ankò nan Siri, nan moman peyi oksidantal ki manm Konsèy Sekirite Òganizasyon Nasyon Zini an pa ka antann yo ak Larisi sou mwayen pou yo mete yon fren nan larivyè san k ap koule nan peyi arab la, kote yon mouvman leve-kanpe sou pye depi 10 mwa kont rejim Prezidan Bashar al-Assad la.
Komite Kowòdinasyon Lokal la, ki baze nan Siri, fè konnen fòs sekirite k ap defann gouvènman al-Assad la touye 30 moun pou pi piti madi 17 janvye 2012 la --19 nan viktim sa yo tonbe nan pwovens Homs ki nan sant peyi a e kote tansyon an monte byen wo.
Gwoup la kontinye pou l di 8 sivil mouri lè yon otobis t al monte sou yon bonm ki te arebò yon wout ; sa rive nan pwovens Idlib, nan pati nò Siri, e nouvèl la di se sòlda k ap defann rejim nan ki te plase bonm nan kote li eklare anba machin nan.