WASHINGTON, DC —
Nan Eta Kalifòni otorite yo idantifye yon nèg ame ki touye 11 moun byen ta nan jounen mèkredi 7 novanm 2018 la nan yon atak ki fèt nan yon restotan-dansan nan pati sid Eta a. Non atakan an se Ian David Long; li genyen 28 tan. Otorite yo poko revele ni rezon-dèt atak sa a ni kote atakan an t ap viv.
Asasina pa bann e pa paket sa rive aprè Ian David Long -ki pèdi lavi li tou- te antre nan klub la, Borderline Bar and Grill ki nan vil Thosand Oaks- avèk yon revolvè plis yon bonm lafimen nan men li. Yon sware rekreyatif pou kèk etidyan inivèsite t ap dewoule nan lokal la lè atakan an te pran tire.
Chèf polis awondisman Ventura a (kote vil Thousand Oaks sitye a), Geoff Dean, fè laprès konnen youn nan premye ajan-polis ki te rive sou sèn nan blese aprè li te antre anndan an pou l te fè fas kare ak atakan an. Misye Dean deklare:
Ofisye polis Ron Helus sikonbe nan yon lopital akoz blese li te resevwa aprè atakan an te tire li.
"Ofisye polis Ron Helus, yon sèjan ki te gen 29 van nan fòs la, sikonbe anba blese li yo apre yo te transpòte li lopital. Mwen rele madanm li pou m di i mari li mouri kòm yon ewo."
Anpil lòt moun blese nan atak la; men kòmandan Dean pa bay chif egzat la paske, daprè sa l di, kèk nan yo te gen posiblite pou yo ale lopital pou kont yo pou yo resevwa swen.