Nan peyi Venezuela, Asanble Konstitiyant la ap fè premye reyinyon l vandredi 4 out 2017 la a nan Palè Lejislatif la nan kapatal peyi a, Karakas, malgre pwotestasyon kominote entènasyonal la ak opozisyon politik la.
Reyinyon 545 delege eli pou re-ekri konstitisyon peyi a ouvri chimen pou yon lòt konfwontasyon ant Prezidan Nicolas Maduro ak opozisyon politik la dapre plizyè obsèvatè. Pati opozisyon an kontinye leve vwa l pou di eleksyon dimanch 30 jiyè dènye yo ilejitim e yo te gen fwod.
Pòtpawòl Depatman Deta ameriken an, Heather Nauert, soti yon kominike jedi 3 out la pou di Lèzetazini pa rekonèt Asanble Nasyonal Konstitiyant la paske pat genyen yon obsèvasyon entènasyonal kredib nan sipèvizyon eleksyon an.