Lidè ris la di: “Mwen te gen espwa relasyon ant 2 peyi nou yo ta pral amelyore; men sanble se pa yon bagay ki pral fèt demen.”
Nan Larisi, Prezidan Vladimir Putin defann gwo rediksyon gouvènman li a mande nan pèsonèl diplomatik Lèzetazini genyen nan peyi a. Misye Putin di li te ret tann lontan ase pou wè si ta pral genyen yon amelyorasyon nan relasyon ant Moskou ak Washington. Lidè ris la fè konnen:
“Mwen te gen espwa sitiyasyon an tap vin pi bon; men sanble se pa yon bagay ki pral fèt demen.”
Bò kote pa l, pòtpawòl Kremlen an, Dimitry Peskov, deklare amelyorasyon nan relasyon ant Lèzetazini ak Larisi ta dwe repoze sou gerizon yon maladi skizofreni politik ki frape Washington; e, dapre li, se yon maladi kap vin pi grav chak jou. Daprè Misye Preskov, 2 peyi yo twouve yo pi lwen olye yo pi pre posiblite pou yo amelyore rapò yo.
Nouvèl la raple Prezidan Putin mande Lèzetazini wete 755 sou 1279 diplomat li genyen sou teritwa ris la. Desizyon sa a se yon repons kifkif Moskou aprè kongrè ameriken an te vote sa pa gen lontan pou li enpoze sanksyon tou nèf sou Larisi.