Anbasadris Lèzetazini nan l ONU, Nikki Haley di: “Lèzetazini pa vle lagè; men pasyans nou gen limit e nou pare pou n defann alye nou yo ak tèritwa nou an."
Manm Konsèy Sekirite Oganizasyon Nasyon Zini an òganize yon rankont dijans lendi 4 septanm 2017 la apre Kore di Nò te reyalize pi gwo tès nikleyè li jiskisi. Rankont sa a dewoule nan moman nouvèl ap tonbe pou di gouvènman nò-koreyen an ap fè preparasyon pou l lanse yon lòt misil balistik. Anbasadris Lèzetazini nan l'ONU an, Niki Haley, ki pran lapawòl devan konsèy la, deklare :
“Li lè, li tan pou nou eksplore tout mwayen diplomatik nou gen a la dispozisyon nou anvan li twò ta. Kounye a nou dwe sèvi ak mwayen ki pi fò posib yo. Jan lidè Kore di Nò a, Kim Jong Un, ap aji la a, se lagè misye ap mande. Lèzetazini pa vle lagè; men pasyans nou gen limit e nou pare pou n defann alye nou yo ak tèritwa nou an."
Yon nonm nan yon estasyon tren nan Sewoul, Kore di Sid kap gade yon televizyon kap bay nouvèl sou dènye tès nikleyè Kore di Nò a, 3 septanm 2017.
Pandansetan, nan Kore di Sid, lame peyi a tire yon seri misil nan direksyon Lanmè Japon an lendi nan kad kèk egzèsis kote militè yo fè kòmsi yo tap lanse yon atak sou enstalasyon nikleyè Kore di Nò yo. Egzèsis sa yo te fèt anvan dewoulman rankont dijans Konsèy Sekirite l ONU an òganize pou manm yo te abòde kesyon tès zam nikleyè Kore di Nò fèk reyalize a. Yon pòtpawòl palè nasyonal la nan Sewoul, kapital Kore di Sid, fè laprès konnen :
“Prezidan Moon Jae-in ak premye minis japonè a, Shinzo Abe, te gen yon konvèsasyon telefònik kote yo mete yo dakò pou di Kore du Nò fèt pou sibi kèk sanksyon tou nèf e byen sevè pou aksyon li poze a."