Otorite Lajistis Amerikèn yo akize ofisyèlman Dr. Joseph Baptiste, yon kolonèl retrete nan lame Etazini kòmkwa li ta mare konplo pou lonje lajan anba tab bay kèk otorite nan gouvènman ayisyen an.
Dr. Baptiste yo te jwenn liberasyon li yon premye fwa apre li te fè yon premye parèt nan yon tribinal federal nan Greenbelt ki nan eta Maryland kote lap viv. Dr. Baptiste, yon dantis byen nan kominote ayisyèn nan prezante devan yon lòt tribinal Distri Federal nan vil Boston nan eta Massachusetts.
Dapre jounal The Miami Herald ki pibliye nouvèl la, nan dat 4 oktòb 2017 la Dr. Baptiste mele nan yon rakèt tankou pran lajan konpayi etaraje ki entèrese vin envesti ann Ayiti nan yon pwojè konstriksyon 84 milyon dola ameriken.
Ajan FBI ki tap mennen ankèt sou ansyen kolonèl Lame Amerikeèn depi nan lane 2014, te pran pòz se envestisè yo ye kote yo te ofri Dr. Baptiste 50 mil dola ameriken pou li kapab chwazi yo pou pwojè a. Doktè a sanble te pran kòb la e li te kontinye mande plis toujou, poun site jounal Miami Herald la.
Dr. Baptiste te fè yo depoze kòb la sou kont yon oòganizasyon non-gouvènmantal lap direje. Sepadan, li te depanse lajan an pou pwòp afè pal.
Lavwadlamerik ap eseye antre an kontak ak avoka Mesye Baptiste la, Mèt Donald Laroche, pou plis detay. Nan yon entèvyou Mèt Laroche te bay VOA Kreyòl nan fen mwa dout pase a, li tè konnen otorite lajistis amerikèn yo pa gen okenn prèv kont kliyan li an.