Pandan Prezidan Trump tap siyen nouvo lwa a, li di lwa sa a pa konstitisyonèl e li pa nan enterè pèp ameriken an.
Prezidan ameriken an, Donald Trump, siyen nan jounen mèkredi 2 out 2017 la lwa sou sanksyon Kongrè a enpoze sou Larisi a, menm si li di se yon lwa ki chaje ak twou vid e ki enkonstitisyonèl. Nouvo lwa a jwenn apui tou 2 pati yo –Pati Repibliken ak Pati Demokrat la. Senatè Chris Coons, yon Demokrat Eta Delaware, eksprime satisfaksyon li poutèt Prezidan Trump siyen lejislasyon an.
“Mwen byen kontan Prezidan Donald Trump poze siyati li anba lwa ki pran sanksyon kont Larisi a. Mwen pa kwè li te genyen le chwa paske Sena a ak Chanm Depite a vote lwa ak yon majorite ki anpeche tout veto prezidansyèl.”
Sou bò pa l, pòtpawòl Mezon Blanch la, Sarah Huckabee Sanders, di Prezidan Trump siyen lwa a paske li kwè sa kapab sèvi inite nasyon an.
“Nap pale klè depi lontan pou nou di nou anfavè sanksyon sevè kont 3 peyi sa yo: Larisi, Iran ak Kore di Nò. Ebyen nou toujou kanpe soumenm bit la; pozisyon nou pa chanje pyès. E mwen panse deklarasyon prezidan an reflete sa mwen di la a.”
Pandan Prezidan Donald Trump tap mete siyati li anba dokiman an, li deklare se yon lwa ki pral anpeche l jwenn bon jan akò ak lòt peyi e defann kòmsadwa enterè pèp ameriken an.