Isit Ozetazini, apre kanpay sere ki te dewoule nan eleksyon espesyal eta Alabama pou pòs senatè a, kandida demokrat, Doug Jones, ki ranpòte laviktwa, di li espere rival repibliken li an, Roy Moore, pral aji kòmsadwa pou l aksepte defèt li nan vòt madi 12 desanm 2017 la.
Mesye Jones ranmase 49.9 pousan nan vwa yo kont 48.4 pousan pou rival li a. Senatè eli a mentni angajman li pran pou l pote inite nan eta a. Doug Jones pibliye yon videyo ki di vòt militè ak vòt pwovizwa yo poko fin konte, e se rezilta sa yo kanpay li a ap tann pou sekretè eta Alabama a sètifye viktwa li nan eleksyon espesyal la.
Nouvo eli a ap ranplase Jeff Sessions ki se aktyèl minis jistis ameriken an. Eleksyon senatoryal Alabama a pwovoke yon gwo chòk ak sezisman lakay obsèvatè yo ki pat atann yo ditou ak viktwa kandida demokrat Doug Jones nan. Akoz eta Alabama te toujou konsidere kòm bastyon pati Repibliken an pandan 25 dènye ane pase yo kote yo te toujou ranpòte majorite vòt yo nan prèske tout eleksyon.