Daprè divès kont medya Etazini, Trump gen entansyon nonmen Senatè Florid Marco Rubio kòm sekretè deta, prensipal diplomat nan peyi a, men anons lan poko fèt.
Madi swa, li te anonse Gouvènè Dakota Sid la Kristi Noem kòm moun li chwazi kòm chèf Sekirite enteryè. Lòt chwa pou Kabinè ki te anonse madi swa yo gen ladan yo Pete Hegseth kòm tèt Depatman Defans, ak John Ratcliffe kòm direktè CIA.
Rubio ak Noem te sou lis Trump pou kandida vis-prezidan li an plizyè mwa avan sa. Menm si Trump te chwazi Senatè Ohio JD Vance, ki nan premye manda li, kòm vis-prezidan eli, Rubio ak Noem te rete loyal ak Trump ki ranpòte eleksyon semenn pase a kont Vis-prezidan Demokrat Kamala Harris.
Ratcliffe te Sizyèm Direktè Entèlijans Nasyonal peyi a, li te sèvi pandan uit dènye mwa administrasyon Trump apre yon pwosesis konfimasyon konplike. Hegseth se yon veteran ak yon animatè Fox News.
Trump te anonse tou ke biznisman milyadè Elon Musk ak antreprenè ansyen kandida prezidansyèl repibliken Vivek Ramaswamy pral dirije sa li rele "Depatman Efikasite Gouvènman." Anons lan te di yo pral bay konsèy ak gidans pou "pouse gwo refòm estriktirèl" nan gouvènman federal la.
Trump te anonse tou madi li te chwazi William McGinley kòm konseye jiridik Mezon Blanch.
Trump te deside tou sou Michael Waltz, yon manm Kongrè Florid, kòm konseye nasyonal sekirite li. Waltz te sipòte efò lejislatif repibliken ki te vle rebatize ayewopò entènasyonal Washington an sou non Trump.
Lendi, Trump te nonmen Thomas Homan, ansyen chèf imigrasyon enterimè li a, "Anperè Fwontyè yo", pou dirije efò pou depòte imigran san papye ki ap viv nan Etazini, ki ka rive nan plizyè milyon, tounen nan peyi orijin yo. Nouvèl yo rapòte Stephen Miller, yon lòt konseye anti-imigran ki te sèvi nan premye manda Trump, ta nonmen kòm chèf politik adjwen Trump.
Prezidan eli a te chwazi yon lòt sipòtè, Elise Stefanik, yon manm Kongrè New York, kòm nouvo anbasadè Etazini nan Nasyonzini. Li te nonmen ansyen Gouvènè Arkansas Mike Huckabee kòm anbasadè nan Izrayèl.
Anvan eleksyon an, Trump, ki ra avwe piblikman erè li, te di nan yon entèvyou ak podkastè Joe Rogan pi gwo erè li pandan manda li soti 2017 pou 2021 an, se te anplwaye "move moun, oswa moun ki manke lwayote."
"Se mwen menm ki te chwazi kèk moun mwen pa t dwe chwazi," li te di.
Kèk nan gwo ofisyèl Trump te chwazi lè sa a, tankou ansyen chèf kabinè l John Kelly ak konseye sekirite nasyonal John Bolton, te vin kritike byen fò de Trump apre li te revoke yo. Kelly te di pandan kanpay ane sa a Trump te koresponn ak definisyon yon dirijan fachis. Trump te atake tou de ansyen ofisyèl sa yo, li kalifye Kelly de " tiran, men yon moun fèb" epi li te di Bolton se "yon idyo."
Anvan eleksyon an, Bolton te di, "Sa Trump ap chèche nan men moun ki pral ak li nan dezyèm manda li a se lwayote. Li vle 'moun k ap di wi mesye' oubyen '' wi madam"
Rubio te afwonte Trump pandan kous prezidansyèl 2016 pou nominasyon repibliken an, Trump te finalman genyen batay sa. Rubio te fawouche Trump pou ti men l ak ten l ki gen yon koulè oranj, pandan Trump te trete Rubio de "ti Marco."
Men, Rubio, tankou anpil lòt ansyen kritik Trump, te yon sipòtè fawouch Trump nan kanpay ane sa a. Nan dènye ane yo, Rubio te pwouve li strik sou politik etranjè, li pran yon pozisyon sevè sou relasyon Etazini ak Lachin, Iran, Venezyela ak Kiba.
Pafwa li te an dezakò ak repibliken ki gen dout sou angajman Etazini nan konfli aletranje, tankou ede finanse batay Ikrèn kont envazyon Larisi 2022. Men, pi resamman, li te vote kont desizyon pou voye plis èd militè Etazini nan Ikrèn, pandan Trump te eksprime tou soupson li sou kantite asistans Etazini bay Kyèv.
Rubio te di nan yon entèvyou ak NBC News nan mwa septanm, "Mwen panse Ikrenyen yo te vrèman brav epi fò nan kanpe kont Larisi. Men finalman sa n ap finansye la a se yon lagè ki pap bouje, ki bezwen jwenn yon solisyon, oswa peyi sa a ap fè bak pou 100 lane."
"Mwen pa pou Larisi — men malerezman, reyalite a se fason lagè nan Ikrèn pral fini se ak yon solisyon negosye," Rubio te di.
Noem te monte nan popilarite nasyonal epi li te jwenn lwanj nan mitan konsèvatè yo apre li te refize enpoze yon manda pou mask nan tout eta a pandan pandemi COVID-19 an 2021.
Daprè rapò, Trump te konsidere li kòm kandida vis-prezidan li. Men, li te fè fas ak kritik toupatou e li te tonbe nan klasman pou vin No. 2 Trump nan mwa avril lè li te ekri nan yon memwa li te touye yon chen "ki pa t antrene" ke li "te rayi" sou fèm fanmi li.
Waltz se yon ansyen sòlda Berè Vèt nan Lame ki pataje opinyon Trump sou imigrasyon ilegal ak soupson sou sipò Etazini kontinye bay Ikrèn.
Waltz, ki te sèvi tou nan Gad Nasyonal kòm kolonèl, te kritike aktivite Lachin nan rejyon Azi-Pasifik la epi li te di Etazini dwe pare pou yon posib konfli nan zòn nan.
Menm si seleksyon inisyal Trump yo notab, li te ekate de ansyen ofisyèl pou pòs enpòtan nan nouvo administrasyon li a se : Nikki Haley, ansyen anbasadè Etazini nan Nasyonzini, ak ansyen Sekretè Deta Mike Pompeo. Haley te anfwonte Trump nan nominasyon prezidansyèl repibliken 2024 la, epi Pompeo te konsidere opoze a Trump anvan li deside soutni li.
Trump ap ale Washington nan Mèkredi pou rankontre ak Prezidan Joe Biden, ki te bat Trump nan eleksyon 2020 la, sou transfè pouvwa avan envestiti Trump 20 janvye. Trump ap planifye tou pou li rankontre ak repibliken nan Chanm Depite yo.