Vis Prezidan Chanm Komès Lèzetazini an, Neil L. Bradley, voye yon lèt bay Minis Pwovizwa Sekirite Enteryè a, Elaine Duke, nan dat jedi 26 oktòb 2017 la, pou mande li pwolonje TPS la (Estati Pwoteksyon Tanporè) pou imigran 3 peyi sa yo: Ayiti, Ondiras ak Salvadò. Dapre Misye Bradley, ki se an menm tan responsab estrateji politik nan chanm nan, “Si TPS la pa renouvle, anpil endistri enpòtan Ozetazini pral sibi konsekans kap grav pou ekonomi an."
Administrasyon amerikèn nan te pran desizyon pou l ofri estati TPS la pou sitwayen 3 peyi konsène yo nan dat diferan e pou rezon diferan: Pou Salvadò sete nan lane 2001; pou Ondiras, ane 1999; epi pou Ayiti sete nan lane 2010. Misye Bradley di nan lèt la:
“Menm lè Chanm de Komès la rekonèt le fèt ke TPS la genyen yan karaktè pwovizwa ou tanporè, yon moun dwe rekonèt rayalite a: sè ke benefisyè yo se moun kap viv epi travay Ozetazini pandan lontan –nan kèk ka pandan 20 tan.
Ayisyen nan Florid kap manifeste pou TPS. (Foto: REUTERS/Carlos Barria).
"Poutèt sa, nou bay Depatman Sekirite Enteryè (Department of Homeland Security) yon konsèy ijan pou l pwolonje TPS la jan li an aplikasyon aktyèlman epi travay avèk Kongrè a sou yon solisyon ki pi pèmanan pou estati moun ki benefisye TPS yo.”
Vis Prezidan Chanm Komès Lèzetazini an kontinye pou l di:
“80% moun ki benefisye TPS la ap patisipe nan fòs travay la Ozetazini. Alòs, si otorite yo kite TPS la fini san yo pa renovoule li, se elimine yap elimine otorizasyon travay pou tout imigran sa yo ki jwe yon wòl enpotan nan ekonomi an kòm anplwaye konpayi nou yo. An plis de sa, si popilasyon sa a rive pèdi pèmi travay yo, sa ka gen konsekans grav pou anpil endistri amerikèn enpòtan kote moun ki posede TPS yo reprezante yon gwo pousantaj nan fòs travay la. Pami endistri sa yo, genyen ki nan konstriksyon, genyen ki nan preparasyon ak distribisyon manje, genyen ki nan otèlri ak sèvis swen sante. “
Chanm de Komès Lèzetazini an Mande Pwolongasyon TPS la pou 50 mil Ayisyen, 195 mil Salvadoryen ak 59 mil Ondiryen. Sèvis Imigrasyon ameriken genyrn pou li anonse anvan lontan si lap renouvle TPS la (23 novanm 2017 pou Ayisyen; 6 novanm 2017 pou Ondiryen epi 8 janvye 2018 pou Salvadoryen).