Ozetazini omwen 23 moun pèdi lavi yo tandiske anpil lòt blese dimanch 3 mas la aprè kèk gwo vouvari van (sa yo rete tònad la) fin fè ravaj nan Eta Alabama, nan pati sid peyi a. Daprè otorite lokal yo, 2 tònad pou pi piti touche tè pandan yon move tan t ap frape tout rejyon sid Lèzetazini. Nouvèl yo fè konnen kantite moun ki mouri yo byen kapab ogmante pandan ekip k ap fè rechèch yo kontinye ap fouye nan debri yo.
Kòmandan polis Awandisman Lee, JayJones, ki pale avèk ajans nouvèl Associated Press, di efò rechèch yo te kanpe pandan nuit la paske debri dezas la kite dèyè te reprezante danje pou ekip li yo.
Dega tònad la kite dèyè nan yon katye nan Alabama.
Sèvis Metewolojik Nasyonal ameriken an te lanse davans avètisman kont tònad pou Eta Alabama, Jòji, Florid avèk Kowolin di Sid, pandan yon move tan sevè t ap travèse rejyon sid la dimanch.
Gouvènè Alabama a, Kay Ivey, deklare yon eta dijans dekwa pou rejyon sinistre yo ak fanmi viktim yo kapab resevwa asistans nan men otorite Eta a.