Sekretè Deta Tillerson Ap Fè yon Toune 6 Jou nan Amerik Latin nan

Sekretè Deta ameriken an, Rex Tillerson, pral kòmanse yon toune 6 jou nan Amerik Latin nan fen jounen jedi premye fevriye 2018 la. Pandan toune sa a, chèf diplomasi amerikèn nan espere akoukaje lidè peyi latino-ameriken yo pou yo pran menm pozisyon sou kriz la nan Venezuela, sètadi kore presyon kap fèt pou gen refòm demokratik nan peyi sa a.

Vwayaj sa a ap mennen Misye Tillerson nan peyi Meksik, Ajantin, Pewou ak Kolonbi, anvan li fè vizit final la nan La Jamayik le 7 fevriye pwochen.

Yon otorite wo-plase nan Depatman Deta a, ki t ap bay laprès detay sou toune a pandan semenn nan, deklare:

<< Lèzetazini pral sèvi ak tout resous li --politik, diplomatik ak ekonomik-- pou l fè fas ak sitiyasyon an nan Venezuela. >>

Anvan Misye Tillerson kite Lèzetazini, li pral rete nan vil Austin, nan Eta Tegzas, kote li pral pran lapawòl nan Inivèsite Tegzas la pou l pale de priyorite administrasyon Trump la pou Emisfè Oksidantal la.