Militan zèl dwat nan Siri di vyolans mòtel kontinye ap sakaje peyi a malgre gouvènman an dakò pou l pèmèt obsèvatè antre nan peyi a pou vinn konstate si wi ou non Siri ap respekte plan lapè a e sispann operasyon sere-boulon brital otorite yo ap fè kont manifestan anti-gouvènmantal yo.
Aktivis yo di fòs sekirite gouvènman an touye ak bal 70 sòlda ki dezète lame siryèn nan nan moman yo t ap eseye kite pòs yo sou fwontyè Siri pataje ak La Turki pandan ke gen 30 lòt ankò ki pèdi lavi yo nan yon lòt rejyon nan peyi a .
Asanble Jeneral Nasyonzini a apwouve masivman lendi 19 desanm 2011 la yon rezolisyon ki kondane vyolans nan Siri yo. Dapre Nasyonzini, vyolans sa yo pran lavi 5 mil moun pou pi piti.
Vis Minis afè etranjè Siri a, Faisal Mekdad, siyen yon akò nan kapital ejypsyènn nan, Le Kèr , yon akò ki va pèmèt obsèvatè lig arab la rete nan peyi a pandan yon mwa.