Siklòn Laura touche tè grann maten nan jounen jedi 27 daout la sou kòt sid Lezetazini ki bay sou Gòlf Meksik la kòm youn nan pi gwo siklòn ki frape peyi a depi plizyè dizèn dane. Li kontinye monte anndan tèritwa ameriken an kòm yon siklòn degrade ki desann nan nivo kategori 1. Nan dènye mizajou Sant Nasyonal Siklòn Ameriken an pibliye, li fè konnen Laura ap pote avèk li van k ap soufle a 145 kilomèt alè, sa ki fè l tounen, jan nou di sa deja, yon siklòn kategori 1 sou yon echèl ki genyen 5 kategori e ki mezire kapasite siklòn yo pou yo koze destriksyon.
Daprè espesyalis meteo yo, Laura kontinye pote avèk li van ki kapab koze anpil dega avèk lapli ki ka pwovoke gwo inondasyon pandan l ap kontinye monte sou pati lwès ak santral Eta Lwizyàn. Menm prediksyon yo fè konnen siklòn nan kontinye pwovoke move tan ki kapab touye moun olon pi fò kòt Lwizyàn.