Plis pase yon milyon moun resevwa lòd pou yo deplase, kitw anpil rejyon sou kòt sid-ès Lèzetazini nan moman yon siklòn trè puisan, Florence, pran direksyon kòt atlantik peyi a.
Deplasman popilasyon an obligatwa nan kèk zòn nan Eta Kowolin di Sid, Kowolin di Nò ak Vijini alòske espesyalis meteo yo ak otorite yo ap ankouraje moun yo prepare yo pou yo fè fas ak van ki ka koze gwo dega, san bliye lapli ki ka lakòz gwo inondasyon.
Daprè Sant Nasyonal Siklòn Lèzetazini an, espesyalis li yo espere Frorence pral touche tè jedi oubyen vandredi semèn sa a; lè sa a l ap gen fòs "yon kokenn siklòn ki estrèmman gwo nèg e danjre."
Foto sa a montre dega Siklòn Hazel, ki te pase sou Kawoin di Nò nan dat 15 oktòb 1954, te fè nan yon katye nan vil Morehead City. Se dènye fwa pati santral kòt-ès Lèzetazini te viktim frap yon siklòn ki gen fòs Florence. Lè sa a Dwight Eisenhower te prezidan ameriken epi Marilyn Monroe and Joe Di Maggio te 2 nan pi gwo non ki t ap anime kolòn "Nouvèl sou Vedèt yo" nan jounal yo Ozetazini.
Florence se deja yon siklòn kategori 4 ki pote avèk li van k ap soufle ak yon fòs 215 kilomèt alè. Espesyalis tan yo panse li pral ranmase plis fòs toujou. Se siklòn ki pi puisan ki menase rejyon an nan preske 30 lane.
Yon siklòn kategori 4 gen fòs pou l rache tèt-kay, derasinen pi fò pyebwa ki sou wout li, pwovoke blackout ki dire lontan epi li ka fè ase dega nan kay yo pou moun pa ka abite ladan yo pandan plizyè semèn, si se pa plizyè mwa. Sant Nasyonal Siklòn Lèzetazini an prevwa gwo move tan sa a pral lage sou zòn ki sou pasaj li yo ant 38 e 50 santimèt lapli.