Stephane Dujarric, potpawol Sekretè-Jeneral Nasyonzini, Antonio Guterres deklare Vandredi ke Sekretè Jeneral la gen anpil kè sote pou sityasyon aktyèl la nan peyi d Ayiti kote manifestasyon popilè yo bloke peyi a nèt.
Sekretè a eksprime sitou preokipasyon li pou sekirite sitwayen Ayisyen yo, pami yo moun ki pi vilnerab yo. Li lanse yon apèl pou kalm ak pou tout moun mete dlo nan diven yo. Li ankouraje tout aktè politik yo pou yo pran mezi tou swit pou kalme tansyon yo, evite zak vyolans epi kite Polis Nasyonal la fè travay li ki se: pwoteje popilasyon an.
Foto Achiv: Potpawol Nasyonzini Stephane Dujarric (a goch) ak Sekrete Jeneral Nasyonzini Antoni Guterres, pandan yon konferans pou lapres.
Dujarric di: "Sekretè a lanse avètisman pou di si sikonstans sa yo kontinye yon sityasyon imanitè ki te deja terib ap deteryore pi plis toujou. "
Li ajoute ke manifestasyon yo ak zak vyolans kap dewoule toupatou nan peyi a rann ni difisil pou oganizasyon imanitè yo pote asistans bay popilasyon an.
Dujarric deklare: " Noumenm ak patè nou yo rete pare pou rete ann Ayiti pou ede pèp la e reponn bezwen ki egziste. Sepandan yon mank finansman ak pwovizsyon ansanm ak risk nap jere andedan peyi a vle di nou pral oblije redi pou fè travay nou nan jou kap vini yo."
Polisye Ayisyen arete yon neg apre yo te jwenn ni ap piye yon magazen pandan yon manifestasyon kont ogmantasyon pri gaz la epi pou mande Premye Minis Ariel Henry bay demisyon li nan Potoprens, Vandredi 16 Sept. 2022.
Dujarric siyale tou, menase tanpèt twopikal Fiona ka poze.
Dujarric di: "Met sou sa tanpet twopikal Fiyona fome nan karayib la e li taka frape Ayiti Lendi. Plan Repons Imanitè 2022 pou Ayiti a mande yon finansman $373 milyon - li finanse a 21 pousan sèlman pou kounyea."
Enfomasyon pou repotaj sa a soti nan Associated Press