O Zetazini, otorite federal yo fè konnen yo arete yon moun ki ta gen responsablite nan yon seri de zak kote enkoni te voye 12 koli pyeje bay kèk pèsonalite wo-plase sou sèn politik la, daprè sa yon ofisyè nan Depatman Jistis la deklare vandredi 26 oktòb la. Pòtpawòl depatman an, Sargha Isgur Flores, di laprès otorite yo ap pare pou yo bay plis enfòmasyon sou afè a pi ta nan jounen an nan yon konferans pou laprès yo fikse a 2 zè de laprè-midi, lè Washington, lè Ayiti.
Nan kòmansman menm jodi vandredi a, Biwo Federal Envestigasyon an (FBI) anonse yo entèsepte yon 11èm koli ki te gen sou li adrès Senatè Demorkat Cory Booker. Menm sous la presize yo entesepte koli sa a nan Eta Florid e li sanble 100% avèk koli pyeje yo te voye sou adrès ansyen Prezidan Barack Obama, kèk lòt gwo zotobre nan Pati Demokrat la ak lòt pòsonalite ki abitye kritike politik Prezidan Donald Trump la.
Biwo chèf polis Awonndisman Broward, nan sid Eta Florid, pibliye foto sispèk la ki rele César Sayoc; li gen 56 zan. Sayoc se moun Aventura, toujou Florid; li tonbe anba men lapolis vandredi 26 oktòb 2018 la nan kad ankèt k ap fèt pou jwenn moun ki te poste seri koli pyeje yo.
Chèn televizyon CNN ak kèk lòt medya fè konnen yo dekouvri, toujou nan jounen vandredi a, yon 12èm pakè avèk yon bonm atizanal ladan n; li te vize ansyen direktè Ajans Nasyonal Enfèmasyon Sekrè a, James Clapper. Mr. Clapper pa pran tan pou l bay CNN yon entèvyou kote li deklare: "Mwen pa etone deske yo te sible mwen; e fòk mwen di ke sitiyasyon an grav anpil."
Yon ti moman aprè otorite yo te fin arete nèg la nan Eta Florid, minis jistis ameriken an, Jeff Sessions, pran lapawòl pou l di lajistis avèk lapolis "ap travay san pran souf" pou yo rezoud pwoblèm nan e yo pran yon angajman fòmèl pou yo "mete men sou moun oubyen gwoup moun ki responsab zak sa yo epi trennen yo devan lajistis."