SPNH, swa Sendika Polis Nasyonal Ayiti a di li kondane ak tout fòs li atak kèk endividi mal entansyone fè sou Radio Televisyon Caraibes dimanch 23 fevriye 2020 an pandan manifestasyon polisye yo. Nòt sa a ki pibliye sou kont Twitter e ki pote siyati kowòdonatris mouvman an, polisye ajan 2 Yannick Joseph, otorite PNH yo revoke, kontinye pou l di Sendika a salye travay medya yo e ke se gras ak yo revandikasyon polisye yo rive nan zòrèy konsène yo.
Nòt la di tou, laprès ak lapolis kondane pou travay ansanm. SPNH la denonse atak sou Radio Televion Cararibes la e li di se yon manèv moun kap eseye diskredite mouvman an.
SPNH la fè konnen yo pa nan politik. Revandikasyon yo se meyè kondisyon pou tout polisye nan PNH la. Li kontinye pou l di SPNH la rete atache ak tout medya yo ansanm ak Radio Television Caraibes ki se yon patrimwan nasyonal.
Anpil sektè nan sosyete sivil la an Ayiti eksprime solidarite yo ak revandikasyon polisye kap reklame dwa pou yo gen yon sendika, men yo pa dakò ak fason mesye dam yo chwazi pou fè revandikasyon sa a pase a.
Dimanch 23 fevriye 2020 an, yon manifestasyon ajan PNH yo te òganize te pakouri plis ri nan kapital la avan pou te al fini nan yon sèn derapaj kote katouch tap tire sou Channmas ant manm nouvo Lame Dayiti yo ak ajan polis manifestan yo. Bilan 2 moun mouri, youn nan chak kan yo. Se te menm jou sa tou endividi moun pat rive idantifye te mete dife nan plizyè machin ki te estasyone devan Radio Television Caraibes.
Dapre Michel Joseph, ko-direktè sal dè nouvel RTVC a ensidan devan radio a rive lè yon gwoup moun non idantifye te fè presyon sou yo pou mande sispann retransmisyon andirèk, yo tap fè ak yon ti avyon telegide sou Channmas nan moman manifestasyon an.