Shane McInerney ki gen 29 lane, ki se moun peyi Irland, konparèt nan jou ki te 14 Janvye a devan tribinal federal Brooklyn, New York, ki te akize l kòmkwa li te agrese e kraponnen yon manm ekipaj vol 45 Delta Airlines ki fè trajè soti Dublin nan Irland pou ale New York nan aewopò Kennedy 7 Janvye pase, dapre yon dokiman tribinal.
Lajistis federal akize l kòmkwa li te refize mete mask malgre ekipaj la mande l fè sa plizyè vwa, ke li te frape yon ti mamit bwason sou tèt pilòt k ap kòmande ekipaj la, e menm "desann pantalon l ak kilòt li e lonje dèyè l bay yon manm ekipaj la, epi wete kaskèt li, foure l nan tèt pilòt la". Lajistis konsidere konpòtman sa a kòm yon krim e si tribinal jwenn li koupab, li ka tonbe anba santans 20 lane prizon," se sa pòtpawòl yon tribinal nan Brooklyn fè konnen.
Sitwayen Irland la ki ta pwal nan eta Florid pou l travay kòm antrenè foutbòl, jwenn libète li sou kosyon $20,000 pandan l ap tann jijman li.
Ajans federal ameriken ki kontwole avyasyon an te dekrete an Janvye 2021 yon politik zewo tolerans pou pasaje ki refize mete mask, alòske manm ekipaj la deja rankontre yon pakèt ka vyolans vèbal oubyen fizik bò kote moun ki refize konfòme yo ak obligasyon sa a. Jedi 20 Janvye, yon avyon American Airlines ki t ap fè vwayaj Miami-Lond te nan wout e te kase tèt tounen akoz yon dam ki te pasaje abò li te refize mete mask pwoteksyon kont COVID-19.