Prezidan chanm bas Kongrè ameriken an Nancy Pelosi patisipe nan yon deba nan Miami ak kèk Ayisyen-Ameriken sou kriz politik la ann Ayiti. Se Depite Frederica S. Wilson ki òganize rankont sila a jedi 3 oktòb 2019 la.
Depite Wilson ak Prezidan Pelosi te santre deba a sou mouvman leve-kanpe ak vyolans k ap fèt ann Ayiti. Depite Wilson, ki te entwodui Madam Pelosi, di pibik la: "Nou genyen avèk nou jodia youn nan fanm ki pi puisan nan lemond." E se avèk gwo bravo piblik la resevwa pawòl sa a.
14 manm Black Caucus Chanm Depite a fè deplasman an avèk Madam Pelosi pou yo patispe nan rankont kominotè sa a nan Miami, dapre sa Depite Wilson di nan kòmansman rankont la.
Yon asistan ki te pran la pawòl di Prezidant Pelosi : "Nou apresye prezans ou la kom 3èm pi gwo otorite Ozetazini. Nou apresye sa anpil. Men nou mande pou Etazini respekte souverennte nou."
Nan mitan, Depite ameriken Frederica Wilson; agoch Marleine Bastien, yon militant dwa imigran nan Miami (FANM)ak yon lòt sitwayèn nan kominote ayisyèn nan. Foto: Serge Michel, Miami Florid, 3 oktòb 2019.
Depite ameriken Frederica Wilson, ki reprezante yon sikonskripsyon ki gen anpil ayisyen nan Eta Florid, te reponn kesyon Lavwadlamerik apre tablewond la kote li fè konnen yo pral kontinye travay pou atire atansyon Kongrè a sou kriz politk la ann Ayiti.
Madam Wilson fè konnen tou, yap tann repons Depatman Deta sou kesyon kèk sitwayen ameriken lapolis ann Ayiti te arete ak gwo zam nan men yo, kesyon yon patisipan te ekri e mande pou panelis yo fè limye sou li.
Apre rankont la, plizyè aysiyen-ameriken nan kominote ayisyèn Miami an te eksprime satisfaksyon yo pou jan yo wè ofisyèl ameriken wo-plase sila yo panche sou kriz politik la ann Ayiti. Yo espere rankont sila va pote rezilta epi ankouraje chanjman ak amelyorasyon nan kondisyon pèp ayisyen an.