Plizyè santèn Ayisyen tounen lakay yo soti Repiblik Dominikèn Jedi, apre prezidan Dominiken an anonse li pral komanse fèmen fwontyè peyi a akoz yon konfli sou konstriksyon yon kanal nan zon rivyè Masak la.
Abinader pase lod pou fèmen fwontyè a apati 6 zè di maten (1000GMT) Vandredi e li di fèmti a pral dire "osi lontan ke nesesè". Otorite Dominiken yo fè konnen yo gen ranfo lame a ak fos polis yo pou egzekite lod sa a, malgre ke negosyasyon ak gouvènman Ayisyen an ap kontinye.
Plis pase mil moun te travèse fwontyè a depi Ouanaminthe, ki sitye tou pre kanal la, lè otorite yo te louvri pandan yon ti tan Jedi apremidi, pos fwontyè sa a pou moun yo tap depote oubyen fanmi ki te bezwen tounen Ayiti.
Harold Estimable, direktè ofis nasyonal migrasyon Ouanaminthe la di gen 250 a 300 Ayisyen ki rive chak jou soti Repiblik Dominikèn an "trè movèz eta".
Nasyonzini lanse avètisman pi bonè semèn sa a ke fanm Ayisyèn kap chache swen medikal pou akouche oubyen swen apre akouchman an nan Repiblik Dominikèn jwenn arestasyon yo pandan konsiltasyon medikal yo e yo tap depote yo tou suit san okenn opotinite pou yo konteste desizyon an.
Repiblik Dominikèn fèmen fwontyè li nan moman zak vyolans gang yo ogmante an Ayiti epi fos plizyè dizèn milye moun kouri kite peyi yo.
Prezidan Abinader fè konnen Repiblik Dominikèn "ap fè preparasyon depi plizyè semèn, non sèlman pou sityasyon sa a men tou pou posibilite pou yon fos lapè ta debake an Ayiti. Li ajoute ke menm si gouvènman Ayisyen an paka kontwole konstriksyon kanal la, Santo Domingo li menm pare pou fè sa.
Abinader di li pral soulve kestyon an devan Nasyonzuni semèn pwochèn kote Asanble Jeneral la pral tanmen 22 Septanm nan Nouyok.