Vis Prezidan ameriken an, Mike Pence, lanse apèl pou l mande plis sanksyon kont Venezuela yon fason pou izole Prezidan Nicolàs Maduro ak administrasyon li a, Misye Pence te lanse apèl sa a yon jou anvan dewoulman sesyon plenyè 8èm. Somè Dèzamerik la nan Lima, Pewou, kote li ta pral repete menm apèl la nan diskou li fè samdi 14 avril 2018 la nan somè a.
Misye Pence mande ranfòsman sanksyon yo pandan li t ap rakontre ak yon gwoup lidè opozisyon venezuelyèn nan ki mande plis sanksyon ak entèvansyon nan peyi yo a k ap soufri anba yon kriz.
Foto sa a montre tout chèf delegasyon (Prezidan, Vis Prezidan, Premye Minis, Vis Premye Minis) ki te prezan nan 8èm Somè Dèzamerik la, nan Lima, Pewou, 13-14 Avril 2018.
Majorite peyi ki te gen reprezantan yo nan somè, ki fini nan fen jounen samdi 14 avril la, dakò pou yo pran plis sanksyon kont rejim Maduro a; men yo vle evite tout aksyon ki ta ka ogmante kantite sitwayen venezuelyen k ap kouri kite yon peyi k ap vin pi pòv chak jou.
Vis Prezidan Pence deklare "delegasyon amerikèn nan pote yon mesaj ki mande plis sanksyon, plis izòlman ak plis presyon diplomatik", paske li rekonèt ke "Venezuela se yon diktati." Prezidan venezuelyen an, Nicolàs Maduro, pa t resevwa envitasyon pou l patisipe nan somè a.