Ozetazini sitwayen yo ta dwe atann yo aske maladi kowonaviris la pwopaje nan kominote kote y ap viv yo. Se Sant Ameriken pou Kontwòl ak Prevansyon Maladi a (CDC) ki lanse avètisman sa a nan jounen madi 25 fevriye 2020 an. Yon espesyalis nan CDC, Doktè Nancy Messonnier, ki t ap abòde pwoblèm nan, deklare: “Kesyon an depase stad kote moun ka mande eske sa pral rive nan peyi nou an; men pito kesyon an se kilè sa pral rive.” Doktè Messonnier bay ameriiken yo yon konsèy prese kote li di yo te mèt atann yo aske y ap oblije fè gwo chanjman nan aktivite chak yo akoz viris la; men li pa kapab prevwa jiska ki degre viris la pral gaye sou tèritwa ameriken an.
Doktè Messonnier lanse avètisman pou l di: “Nou mande piblik ameriken an prepare l pou sizoka sitiyasyon an ta vin grav anpil.” Avètisman sa a vini yon ti tan aprè yon gwo otorite nan Òganizasyon Mondyal Lasante (OMS) te di, nan menm jounen madi a, peyi yo atravè lemond ta dwe panse fè preparasyon pou yon eklatman kowonaviris la e fòk yo pare kèk plan pou yo reyaji rapidman lè viris la rive sou yo. Vrèmanvre, Doktè Bruce Aylward, ki se chèf yon misyon miks OMS-Lachin ki fòme pou konbat maladi mòtèl la, te deklare: “Si nou pa panse fè preperasyon sa a, nou pa p pare pou epidemi an. An fèt, lemond poko pare pou sa kounyela a; men li kapab pare.”
Misye Aylward fè konpliman pou Lachin poutèt sa li rele “mobilizasyon ekstrawòdinè” peyi sa a mete sou pye pou l konbat epidemi an. Daprè li, se yon egzanp ki montre kijan aksyon agresif nan domèn sante piblik la kapab anpeche maladi a pwopaje. Li di: “Lachin konnen kijan pou l pwoteje lavi moun.” Li bay tout peyi konsèy pou yo prepare kèk zòn izole ak kabann lopital, epi pou yo garanti ke pwovizyon oksijèn ak aparèy respiratwa disponib pou malad k ap soufri ak enfeksyon grav kowonaviris la.
Sekretè-Jeneral l'ONU an, Antonio Guterres (agoch) ki te chita bò kote Direktè Jeneral OMS la, Tedros Adhanom Ghebreyesus (adwat), te pran lapawòl nan yon sesyon sou evolisyon maladi COVID-19, ou kowonaviris, nan vil Jenèv, an Suis, madi 25 fevriye 2020 an.
Bò kote pa l, Sekretè Jeneral Oganizasyon Nasyon Zini, Antonio Guterres, lanse apèl bay gouvènman yo atravè lemond pou l mande yo “fè tout sa ki nesesè.” Prezidan Donald Trump, ki pale tou madi a, di Lachin “ap travay byen di sou pwoblèm nan” e li panse Lèzetazini twouve l jiskaprezan nan yon bon sitiyasyon. Lidè ameriken an di: “Nou gen anpil chans jiskaprezan, e nou panse sa pral rete konsa.”
Lendi 24 fevriye a administrasyon Trump la te soumèt devan Kongrè a yon demand pou lajan kote li te di kòb sa a pral sèvi pou devlope vaksen e pou achte meteryèl pou tretman ak ekipman ki ka pwoteje moun. Lidè demokrat yo eseye rejte plan an paske, dapre yo, La Mezon Blanch pa p fè ase efò kont kowonaviris la, puiske l ap detounen lajan ki la deja pou lòt priyorite sante.
Machedlabous yo fèmen avèk yon bès plis ke 3% madi o Japon, tandiske nan Lachin endis mache a rebondi aprè yon bès apik yo te anrejistre pou jounen lendi a. Pandansetan Ozetazini endis mache a te sibi yon bès anviwon 3% lendi; men yo fè yon monte lejèman aprè tranzaksyon yo te kòmanse madi.
Ann Itali, manm Chanm Bas la mete mask nan figi yo pou yo pwoteje tèt yo pandan yon sesyon nan jounen madi 25 fevriye 2020 an.
Sou kontinan ewopeyen an, epidemi kowonaviris la frape byen fò Peyi Itali avèk plis pase 200 ka enfeksyon plis omwens 7 moun ki mouri. Gouvènman an anile aktivite kanaval yo e li ranvwaye pi gwo match yo nan konpetisyon foutbòl pwofesyonèl la, tandiske li fèmen lye piblik yo tankou pak touristik, mize, plas piblik, elatriye.
Anfen nan Peyi Izrayèl otorite yo deside anile envitasyon yo te voye bay 3 mil atlèt entènasyonal ki te deja enskri pou yo patisipe nan yon maraton vandredi pwochen nan Tel Aviv. Yo fè konnen evennman an kapab dewoule jan yo te prevwa l la, men se san patisipasyon atlèt k ap sòti andeyò peyi a.