Ozetazini, Republiken yo lanse kèk gwo kritik kont administrasyon Obama a aprè nouvèl te parèt, nan jounen jedi 18 out 2016 la, pou di kòmkwa Lèzetazini te ofri Iran lajan (yon afè de 400 milyon dola) pou liberasyon yon gwoup sitwayen ameriken ki te nan prizon nan vil Teyeran.
Prezidan Chanm dè Reprezantan an, Paul Ryan, pibliye yon deklarasyon kote li di “Prezidan Obama ak administrasyon l lan gen lontan depi yap ban nou manti e prezidan an fèt pou l bay pèp ameriken an yon eksplikasyon total pou aksyon li a e pou yon presedan danjre li tabli la a.”
Bò kote pa l, kandida a la prezidans Pati Repibliken an, Donald Trump, di Prezidan an se yon "mantè" poutèt li te demanti opinyon ki fè kwè pèman lajan an se yon ranson. Anfen, prezidan komisyon afè etranjè Lachanm nan, Repibliken Ed Royce, deklare :
“Pèman lajan an mete lavi plis ameriken an danje. Sa bay Iran yon pozisyon de fòs. Franchman, se ankouraje nou ankouraje ennmi nou yo pou yo pran plis ameriken ann otaj.”