WASHINGTON, DC —
Prezidan ameriken an, Donald Trump, pa atann li byen ni avèk FBI (Biwo Ankèt Federal la) ni avèk Depatman Jistis la sou kesyon pou konnen èske otorite yo dwe pibliye yon memo sekrè ki ta fè konnen kòmkwa kèk nan otorite lajistis pi wo plase yo ta gen paspouki kont Prezidan an.
Dokiman an --ki rele "Memo Nunes", swa non depite Repibliken ki te prepare li pandan 2 zou 3 semèn ki pase yo-- ta genyen detay sou efò Depatman Jistis la ta fè anvan eleksyon prezidansyèl novanm 2016 la pou yon tribinal ki okipe zafè sèvis sekrè ta ba li otorite pou l tabli siveyans sou kontak responsab kanpay elektoral Trump la te genyen avèk ajan sekrè Larisi.
Depite Devin Nunes (R-Calif.), pandan li t ap antre nan biwo Komisyon Sèvis Sekrè Lachanm nan sou Kapitòl la nan Washington. (Foto Achiv: 16 janvye 2018).
Lidè Pati Demokrat la ak lòt sektè ki kritike memo a fè konnen moun ki te prepare dokiman an te triye byen triye anvan li chwazi ki enfòmasyon sekrè pou li itilize pou l montre kòmkwa ankèt sou enjerans Larisi nan eleksyon an se yon ankèt ki chita sou patipri politik. Demokrat yo prepare pwòp memo pa yo ki rejte konklizyon Repibliken yo; men kèk sous fè konnen li pa sanble yo pral prese pibliye dokiman sa a -si jamè yo pibliye li.Pezidan Trump fè konnen li dakò pou yo pibliye memo repibliken an; se konsa otorite yo nan Le Mezon Blanch pibliye, jedi premye fevriye 2018 la, yon deklarasyon kote yo di yo te li dokiman e yo pase li an revi. Memo sa a kapab sòti deyò nenpòt ki lè.