Anbasadè nò-koreyen an nan Konferans sou Dezammeman Jenèv la, Han Tae Song, di: “Nou kondane kategorikman sanksyon Konsèy Sekirite a fèk pran yo -paske yo ilegal e enjis.”
Nan Kore di Nò, otorite yo pa mete dlo nan bouch yo pou yo kritike, nan jounen madi 12 septanm 2017 la, desizyon Konsèy Sekirite l'ONU an pran pou l enpoze sanksyon ki pi sevè sou peyi azyatik la . Se konsa tou Pyongyang lanse avètisman bay Washington pou di Lèzetazini kapab konnen soufrans ki pi tèrib la poutèt se li ki te pran devan nan efò pou mete sanksyon sa yo sou Kore di Nò.
Anbasadè nò-koreyen an nan Konferans sou Dezammeman Jenèv la, Han Tae Song, deklare:
“Delegasyon m nan kondane kategorikman e ak pawòl ki pi sevè posib yo dènye seri sanksyon Konsèy Sekirite a fèk pran yo -paske nou konsidere sanksyon sa yo ilegal e enjust.”
Prezidan Donald Trump, ki tap abòde dosye a ak laprès nan menm jounen madi a nan La Mezon Blanch, deklare :
“Nouvo seri sanksyon sa yo se tou senpleman yon ti pa an avan sou wout nou vle pran an; se sèlman twokèt la lè w konpare yo ak sa ki pral rive Kore di Nò finalman.”
An plis Kore di Nò reyaksyon tonbe tou nan kèk lòt peyi azyatik; si reyaksyon say o pozitif, anpil lidè rejyonal panse sanksyon yo pap tèlman gen konsekans enpòtan sou gouvènman nò-koreyen an.