Lidè Mondyal yo chante lwanj yon nouvo akò klimatik ke prèske 200 peyi siyen byen ta Samdi swa pou akselere aksyon yo vizavi pwoblem sa a ki afekte tout peyi sou latè. Desizyon an pran nan fen rankont o somè COP26 Nasyonzini an ki dire 2 semèn nan peyi l'Ekòs.
Lidè ki siyen ako Glasgow sou Chanjman Klimatik pwomèt pou yo travay ansanm pou limite rechofman klimatik la a pa plis pase 1.5 degre Santigrad nivo pre-endistriyèl yo, ki se objektif yo te fikse pandan rankont o somè Paris a an 2015.
"Sa se veritab pwogrè, 1.5 degre se yon bagay nou ka atenn," Prezidan COP26 la, Alok Sharma di delege yo apre siyati ako a. "Nou fè pwogrè sa a ansanm. Men fòk nou kontinye pase a l'aksyon e mete ann aplikasyon mezi sa yo pandan 10 zane kap vini yo.
Nan moman negosyasyon yo tap pran fen Samdi, End ak la Chin te ensiste pou pran angajman ki mwen fèm pou elimine enèji a baz chabon ak petwòl yo. Sete yon chanjman leje men enpotan ki te vekse prezidan rankont la.
"Mwen prezante ekskiz mwen pou fason pwosesis sa a dewoule, mwen vreman regrèt sa," Sharma deklare. "Mwen konprann santiman desepsyon an. Men mwen kwè, jan nou remake'l, ke li te esansyèl pou'n pwoteje akò sa a tou."
End, la Chin ak Afrik di Sid te plenyen pou di pwojè pou elimine enèji konbustib fosil yose pral yon enjistis. Prèske 70% enèji End sèvi baze sou chabon.
Akò ki siyen an admèt angajman ki egziste pou redui gaz a efè de sèr yo pa fè ase pou liite rechofman global la a pa plis pase 1.5 santigrad pi wo pase tanperati pre-endistriyèl yo. Men akò a pran angajman pou peyi ki siyen'l yo retounen ane pwochèn ak pi bon objektif pou redui nivo gaz sa yo pi vit pase sik 5 an yo te prevwa anvan an.
Peyi rich yo mete yo dakò pou ogmante angajman yo vizavi finansman klimatik e pou yo double kantite lajan yap peye peyi sou devlope yo pou ede yo adapte a chanjman klimatik epi dekarbonize ekonomi yo anvan ane 2025.