Pou anpil Ondiryen, eleksyon Dimanch la se yon kestyon wetire yon pati sou pouvwa a ki te vinn de plizanpli kowonpi pandan 12 zan li dirije pouvwa a, e ki koze dè dizèn milye sitwayen kouri kite peyi a.
Pou elektè sa yo, li pi enpotan pou yo dechouke pati politik nasyonal Prezidan Juan Orlando Hernández la pase chwazi kiyes k ap ranplase'l. Kolè moun yo kont Hernandez telman anpil, ke pou plizyè zane migran ki tap kite Ondiras yo te chante "Alevouzan J.O.H" an palan de inisyal prezidan an.
Met sou sa, avoka gouvènman federal Ameriken nan Nouyok akize misye deske lap dirije yon "eta narco" e ke li sèvi ak lajan dwog pou finanse siksè politik li. Hernandez demanti akizasyon sa yo. La jistis poko asiyen'l ofisyèlman, men sa taka chanje si li kite pouvwa a.
Gen 14 kandida a la prezidans e 2 pami yo sanble yo gen anpil chans pou yo ranpote la viktwa.
Majistra Tegucigalpa a, Nasry Asfura se moun Prezidan Hernández chwazi kom siksesè li. Ansyèn premyè dam Xiomara Castro limenm ap poze kandidati li a la prezidans yon twazyèm fwa. Lame a te ranvèse mari li, Jose Manuel Zelaya, sou pouvwa a nan ane 2009.