Manifestan nan peyi d'Ayiti bloke wout yo anba lavil kapital la Pòtoprens, Mèkredi, kote moun te ka tande kout zam nan moman moun te nan lari pou montre jan yo vekse poutèt rate gaz la ki entansifye akoz zak vyolans gang yo.
Stasyon gazolin toupatou nan peyi a fèmen pou pi fò, e prensipal tèminal petwòl la oblije sispann operasyon akoz 2 gang rival kap twoke kout zam nan zon nan. Zak vyolans gang yo lakoz 50 moun pou pi pitit pèdi lavi yo.
Chofè moto yo Mekredi bloke kek entèseksyon nan Pòtoprens epi boule kawotchou.
Your browser doesn’t support HTML5
Manifestan Bloke Lari Potoprens pou Pwoteste Kont Rate Gaz la
Kout zam te marye pandan yon ti tan, men li pa klè kiyès ki tap tire ni poukisa.
"Ensekirite a se yon gwo pwoblem pou Ayiti. (Premye Minis) Ariel Henry ap travay sou yon solisyon rapid," yon pòt pawòl pou Primature la di ajans nouvèl Reuters.
Batay ant gang rival G9 ak GPEP pou kontwòl Site Soley depi Vandredi pase a lakoz de milye moun bloke san aksè ak manje ni dlo.
Se menm hing hang sa a ki fose yo fèmen tèminal petwòl Varreux a.
Yon gwoup manifestan monte yon barikad akoz yo vekse poutet rate gaz la nan Potoprens, Ayiti, 13 Jiye, 2022.
Gen 2 bato kap transpote gazolin enpòte ki paka livre kagezon yo e kamyon petwòl ki distribye gazolin nan stasyon esans yo paka pwoche tèminal la akoz yo krenn pou sekirite yo, yon sous di Reuters.
Sityasyon sa a tèt koupe ak yon pwoblèm konsa ki te prezante nan mwad Oktòb pase a, le lidè gang Jimmy "Barbecue" Cherizier - ke Etazini akize de abi dwa moun - te dirije yon blokaj tèminal Varreux pou egzije Henry bay demisyon li.
Yon machann pase bo kote yon seri kawotchou kap boule nan moman moun move kou kong nan Potoprens akoz rate gaz zak vyolans gang yo koze nan peyi d'Ayiti, 13 Jiye, 2022.
Sa te koze gwo rate gaz epi fose anpil biznis fèmen, lopital yo te limite operasyon yo tou, jiskaske blokaj gang lan te leve prèske yon mwa pi ta.
Cherizier, ki fè kò'l tou piti depi ane pase a, te parèt nan yon videyo kap sikile sou WhatsApp kote li di batay ant gang yo fè pati yon jefò pou amelyore ensekirite a nan peyi a.
Enfomasyon pou repotaj sa a soti nan Reuters