Nan Bewout, kapital Peyi Liban, sekouris yo ap chache wè, nan jounen jedi a, si y a jwenn moun ki disparèt pandan peyi a pran dèy pou sila yo ki mouri nan yon gwo kokenn eksplozyon ki te fèt madi pase a nan pò vil la. Depatman Sante Piblik la fè konnen kantite moun ki pèdi lavi yo monte rive 137, mete sou plis pase 5 mil lòt ki blese nan eksplozyon an. Otorite yo atann yo aske kantite mò yo pral ogmante.
Kabinè ministeryèl la dekrete 2 semèn eta dijans e gouvènman an pase otorite milite yo lòd pou yo arete nenpot ki moun ki te enplike nan plase materyèl eksplozif nan depo kote mateyèl sa a sote nan pò kapital a. Gouvenè Bewout la, Marwan Abboud, fè konnen sa li rele “yon sitiyasyon apokaliptik la” --yon sitiyasyon ki mete vil Bewout tèt-anba-- kite anviwon 300 mil moun san kay pou yo rete.
Prezidan fransè a, Emmanuel Macron, debake jedi nan Bewout kote li rankontre ak lidè politik yo. Lafrans, ki se ansyen puisans kolonyal la nan Liban, ap depeche dijans yon ekip doktè nan Bewout avèk plizyè tòn ekipman medikal. Larisi, li-menm, ekspedye yon lopital militè ak 50 pwofesyonèl nan domèn sante a; tandiske Katar, bò kote pa l, ap voye yon ekip medikal ansanm avèk plizyè kamyon chaje pwovizyon ak ekipman.