Etazini

Lapolis Wisconsin di Sispèk ki Frape Moun ak Machin Ni Pandan yon Parad te Fèk Mele nan yon Mezantant ak Moun Lakay li

Lapolis pran pozisyon anba lavil Waukesha, Eta Wisconsin, apre yon machin te frape moun ki t ap patisipe nan yon parad Nwèl, 21 novanm 2021.

WAUKESHA — 

Lapolis nan vil Waukesha, Eta Wisconsin, di sispèk ki koze lanmò plizyè moun apre li frape yo ak machin ni pandan yon parad Nwèl te mele nan yon hinghang ak moun lakay li kèk minit anvan li te touye 5 moun epi blese 48 lòt.

Chèf Polis Waukesha a, Dan Thompson, deklare lendi pa gen okenn prèv ki ta montre se yon zak teworis. Li ajoute lapolis ap pare 5 chèf akizasyon pou omisid entansyonèl kont sispèk la, Darrell Brooks, yon nwa ki gen 39 an e ki se moun vil Milwaukee.

Kòmandan Thompson idantifye moun ki mouri yo kòm 4 fanm ki gen 71, 52, 52 ak 79 an. Yon granmoun gason ki gen 81 an mouri tou. Viktim sa yo te manm klib "Dancing Grannies" (Mèmè k ap Danse) epi youn nan yo sete yon anplwaye bank Citizens Bank.