Otorite eta Ohio yo di yo pral pibliye videyo ki te anrejistre pandan yon ensidan kote lapolis te tire e touye yon dam ansent nwa.
Lapolis di Ta'Kiya Young, 21 an, se yon moun yo te sispèk te volè nan magazen.
Yo di li mouri apre li te akselere machin ni pou fonse sou yon polisye ki tap eseye bare li pou l pa chape nan pakin yon supèmache.
Pitit ki te nan vant dam nan mouri tou.
Lapolis nan banlye vil Columbus la gen entansyon pibliye videyo lapolis te anrejistre Vandredi, ki se prèske yon semèn apre yo te tire dam nan, 24 Out.
Avoka fanmi Young lan kritike delè lapolis pran pou fè sa.