Oganizasyon Mondyal Lasante (OMS) fè konnen, jou jedi 30 avril 2020 an, li pa resevwa nan men Lachin okenn envitasyon pou l patisipe nan yon ankèt peyi sa a ap mennen pou konnen kisa ki koze panemi kowonaviris la. Reprezantan OMS la nan Peken, Doktè Gauden Galea, fè konnen li atann ni aske Lachin pral diskite avèk òganizasyon entènasyonal la nan lavni sou fason yo kapab kowopere. Doktè Galea deklare:
“Nou okouran yon ankèt k ap dewoule kounyela a menm nan Lachin; men jiskaprezan nou pa resevwa envitasyon pou n patisipe ladan l. Nou espere nou pral resevwa, nan yon avni ki pa twò lwen, yon kontrandi k ap di nou ki kote envestigasyon sa a ap fèt e ki tip kolaborasyon nou ka bay chinwa yo.”
Maladi KOVID-19 --ke kowonaviris la bay la e ki te eklate pou la premyè fw nan vil Wouhann, nan Lachin, an deasnm 2019-- deja touye plis pase 230 mil moun nan lemond, dapre enfòmasyon responsab yo rasanble nan Inivèsite Johns Hopkins, tandiske ka enfeksyon konfime yo monte rive 3 milyon 200 mil.