Lakou Siprèm Lèzetazini fè konnen li pral etidye dekrè sou entèdiksyon vwayaj Prezidan Donald Trump te pibliye nan kòmansman manda li a, antretan, pifò nan arete prezidansyèl la kapab antre anvigè.
Arete prezidansyèl revize Mesye Trump la, moun konsidere kòm yon entèdiksyon vwayaj, bloke antre Ozetazini moun kap soti nan 6 peyi, kote mizilman an majorite, pou yon peryòd 90 jou; epi kanpe sou pwogram akèy refijye sou teritwa ameriken an pou 120 jou.
Dekrè a presize, mezi sa yo nesesè pou revize ankèt sekirite konsènan vwayajè, yon fason pou pwoteje Lèzetazini anba menas kap soti lòt kote.
Anvan, genyen 2 tribinal ameriken ki te kanpe arete prezidansyèl la, youn nan eta Hawaii ak lòt la nan eta Maryland. Yon tribinal kou dapèl federal te mentni 2 premye vèdik yo.