Yon jou anvan dewoulman yon 3èm rankont ant lidè 2 Kore yo (Kim Jong UN, pou Kore di No, ak Moon Jae-in, pou Kore di Sid) prezidan Moon deklare objektif li se chache garanti yon lapè dirab ant Sewoul ak Pyongyang, epi, an menm tan, chache rapwoche Kore di Nò avèk Lèzetazini.
Misye Moon bay detay sou objektif sa yo pandan li t ap rankontre ak prensipal kolaboratè li yo nan kapital Kore di Sid la lendi 17 septanm nan. Madi prezidan sid-koreyen an prale nan Kore di Nò pou premye nan yon seri de negosyasyon k ap dire 3 jou avèk Kim Jong Un.
Prezidan Moon fè kolaboratè l yo konnen l ap chache sa li rele "yon lapè moun pa ka defèt e ki dirab" avèk Kore di Nò, yon lapè ki pa p deranje malgre kondisyon entènasyonal yo. Li ajoute li pral santre diskisyon l yo ak Kim Jong Un sou efò ki dwe fèt pou bese tansyon militè ki egziste ant 2 Kore yo e ki la depi fen Lagè Kore a nan lane 1953. Lagè sa a, ki te dire 3 zan, te fini avèk yon seselfe e non yon trete lapè; sa ki vle di ke teknikman yon eta-de-gè toujou egziste ant 2 peyi yo.