Konsèy Sekirite Nasyonzini an ranvwaye vot ki te sipoze fèt sou ekstansyon misyon politik li ann Ayiti apre la Chin te mande pou fè konsiltasyon dèyè pot femen sou rezolisyon yo tap pwopoze a.
La Chin pa gen relasyon ofisyèl ak Ayiti. Se Taiwan gouvènman Ayisyen an rekonèt ofisyèlman - e li gen anbasad nan Taiwan - e vise vèsa.
Anbasadè adjwen La Risi nan LONU, Dmitry Polyansky deklare apre rankont la ke "tout moun trè preokipe, e nou kwè fok nou fè plis." Kesyon nap poze se "kisa nou ka fè an tèm pratik," li deklare.
Lèzetazini ak Meksik, kap ekri rezolisyon an, pral fè kèk chanjman nan teks la.
Nan mwad Oktob 2021, yo te fè yon konpwomi ak La Chin a la dènyè minit pou pwolonje pou 6 mwa sèlman misyon Nasyonzini an. Anpil lot manm konsèy la tap mande pou LONU gen yon prezans a lon tèm ann Ayiti e yo tap mande pou pwolonje manda a pou 1 ane pito.
Rezolisyon sa a te pase a l'inanimite (tout manm yo te vote wi) pou pwolonje misyon an pou jouk Vandredi sa a. Diplomat yo di yo atann yo aske ap gen yon vot sou yon nouvo rezolisyon jou sa a - kidonk 15 Jiyè.
Your browser doesn’t support HTML5
Konsey Sekirite LONU Diskite Ensekirite Ayiti, Renouvelman Manda BINUH
Lè yo te adopte rezolusyon an nan mwad Oktob, Ayiti tap eseye jere konsekans asasina Prezidan Jovenel Moise nan mwad Jiyè 2021 an, ansanm ak yon tranblemanntè ak yon magnitid 7,2 ki te frape sid peyi e epi koz lanmo plis pase 2,200 moun nan mwad Out la. Met sou sa peyi tap fè fas ak yon ogmantasyon aktivite gang yo, kidnapping epi batay ant gang rival yo.
Yon ane apre asasina a, zak vyolans gang yo vinn pi grav, e Ayiti ap plonje desann nan yon kriz ki gen move konsekans ekonomik. Sa lakoz yon pakèt Ayisyen kouri kite peyi a pou al viv lot bo dlo.
Semèn sa a, responsab yo nan kapital Ayisyèn nan rapote gen plizyè douzèn moun ki mouri nan batay ant gang rival yo nan Cite Soleil. Medsen San Fwontyè di Madi gen plizyè milye moun ki bloke nan katye a san aksè a dlo potab, manje, ni swen medikal.
Gouvènman Ayisyen an ap redi pou'l sere boulon gang yo. Pandansetan, jefo pou fome yon gouvènman kowalisyon echwe, e jefo pou oganize eleksyon jeneral echwe tou. Anpil moun ap poze kestyon pou konnen - ki kote peyi a prale.
La Chinn vekse anpil akoz Ayiti gen relasyon diplomatik ak Taiwan. Ayiti se youn pami 13 peyi sèlman nan mond lan ki rekonèt gouvènman demokratik Taiwan nan, ke La Chin reklame kom teritwa pa li.
Yon taksi-moto pase bo kote yon barikad kawotchou kap boule pandan yon manifestasyon chofe taksi yo nan Potoprens, pou pwoteste kont rate gaz la, Mekredi 13 Jiye, 2022.
Nasyonzini gen yon prezans ann Ayiti depi ane 1990, e dènye fos mentyen lapè LONU a te pase ant 2004 ak Oktob 2017 nan peyi a. Misyon politik ki la kounyea bay gouvènman Ayisyen an konsèy sou kijan pou'l "fè pwomosyon pou epi ranfose stabilite politik ak bon gouvènans". Nan kad objektif sa a gen eta de dwa, yon diyalog enklizif ak pwoteksyon dwa moun.
Anbasadè Meksik nan LONU, Juan Ramon De La Fuente Ramirez di jounalis yo anvan rankont Mèkredi a ke li gen anpil kè sote pou sityasyon an ann Ayiti.
"Li lè pou'n aji yon fason entelijan ak efikas," Ramirez di. Li ajoute ke yon nouvo rezolisyon ta dwe mansyone koz zak vyolans yo, ki se yon bagay ki pat fèt anvan.
Anvwaye Meksiken an lanse apèl tou pou antreprann an tout ijans yon diyalog entè-Ayisyen, ki ta gen patisipasyon gang yo "paske se sèl mwayen Ayisyen ap kapab pran responsabilite."