Prezidan ameriken an, Donald Trump, deklare li konsidere peyi Iran kòm "pi gwo ekspòtatè aktivite terowis nan lemond"; li kontinye pou l denonse akò miltilateral kèk peyi te siyen ak Iran nan lane 2015. Lèzetazini te youn nan siyatè yo, men Misye Trump te wete peyi a nan antant la pi bonè ane sa a.
Pandan lidè ameriken an t ap prezide rankont Konsèy Sekirite l'ONU an sou Non-Multiplikasyon Zam Nikleyè (yon rankont ki dewoule mèkredi maten a-kote Asanble Jeneral l'ONU an, nan New York), Misye Trump di:
<<Agresyon Iran yo pa sispann; okontrè se ogmante yo ogmante aprè li te siyen akò nikleyè a.>>
Yon apèsi sou Konsèy Sekirite l'ONU an nan moman prezidan ameriken an, Donald Trump, t ap ouvè rankont konsèy la nan matine jounen mèkredi 26 septanm 2018 la nan New York nan koulis Asanble Jeneral la.
Prezidan Trump, ki lanse avètisman pou l di Lèzetazini pral pran plis sanksyon , sanksyon pi djanm kont Iran- ajoute:
<<Yon rejim ki gen yon move dosye tankou Iran pa ta dwe jwenn pèmisyon pou l posede zam nikleyè.>>
Rankont Konsèy Sekirite a dewoule yon jou aprè lidè ameriken an te lanse apèl bay dirijan mondyal yo pou l mande yo "izole Iran toutotan li kontinye komèt agresyon".