18 ex-solda Kolonbyen ki femen nan prizon ann Ayiti an koneksyon ak asasina Prezidan Jovenel Moise - rete an detansyon nan kondisyon sevè san okenn avoka pou defann yo. Fanmi yo nan Kolonbi denonse sityasyon yo.
La jistis Ayisyen poko rive jwenn tout prèv ki montre gwoup yo arete a te planifye ak finanse konplo a vreman vre.
Fanmi ex-solda yo te pran lari Jedi kote yo te kanpe sou plas Bolivar la nan vil Bogota ak pannkat ki di "Jistis" epi "Garanti Dwa Moun".
Bogota se sant politik peyi Kolonbi, kidonk fanmi yo fè ekspre pou politisyen yo tande kri yo epi mete plis presyon diplomatik pou asire dwa prizonye yo respekte. Yo vle tou pou akize yo gen yon pwosè ki jis.
"Nou bezwen pou yo koute nou, menm jan ak tout kretyen vivan nap mande yon pwosè ki jis pou verite a ka soti pou tout mond lan tande'l epi epou tout moun reyalize ke mesye yo inosan, yo pran nan pèlen," Irene Gomez, manman eks milite Jhon deklare pandan li tap kriye.
Fanmi Kolonbyen ki femen nan prizon ann Ayiti poutet yo te swadizan patisipe nan asasina Prezidan Jovenel Moise sa gen yon lane, pran lari pou manifeste nan Bogota, Kolonbi, Jedi 7 Jiye, 2022.
Jairo Ramirez di Associated Press "pitit gason mwen di'm nan yon lèt 'manmni ou pa bezwen bese tèt ou, mwen inosan."
Lapolis Nasyonal Ayisyen mete solda Kolonbyen yo anba kod kèk hè'd tan apre asasina Moise la nan granm maten 7 Jiyè 2021, lè yon gwoup te debake nan rezidans prive li, fiziye li epi gravman blese madanm ni, Martine, ki soti vivan.
Prezidan Kolonbyen Ivan Duque deklare nan yon entèvyou ak AP ke gen temwayaj ajans sekirite entènasyonal yo genyen kote li "klè ke gen yon nivo konplisite" nan asasina a pami "prèske tout" ex-solda yo arete yo. Duque deklare nan lot okazyon ke kèk pami yo te rive ann Ayiti gras ak yon desepsyon epi yon "ti gwoup" te pran tèt yo paske yo te konnen vre plan an sete asasina Moise.
Pandan operasyon lapolis la, gen 3 ex-solda ki mouri, men rezilta egzamen medikal yo apre lanmo a poko pibliye. Gen youn nan milite yo, Mario Antonio Palacios Palacios, ki te chape poul li, al lage ko li nan La Jamayik iote yo te arete'l epi evantyèlman voye'l Ozetazini kote la jistis Ameriken akize'l ofisyèlman an koneksyon ak asasina a. Palacios plede non koupab.