Karavan ki te pati kite Tapachula 23 oktòb pase a rive nan vil Suchilapan Veracruz nan apre midi jou ki te 16 novanm nan. Imigran yo travèse baryè prensipal eta a ansanm ak prezidan òganizasyon pèp san fwontyè, an prezans ofisyèl enstiti meksiken pou migrasyon.
Responsab pèp san fwontyè Irineo Mujica deklare "imigran yo pa fè ofisyèl imigrasyon Meksiken yo konfyans poutèt yo bay pwoblèm ak viza imanitè a. imigran yo gen 9 mwa ou byen 12 mwa depi y ap tann viza a. ki jan w kapab kwè yon moun ki deja fè w mal."
Roberto Gonzalez, yon responsab nan enstiti migrasyon meksiken pale pou di nou ofri moun ki vle abandone karavan nan yon viza imanitè. Pèmi sa a valab pou yon lane e ofri yo posibilite pou deplase nan peyi a pou travay nan aktivite ki legal.
Veracruz se 3èm eta karavan imigran sa a gen pou travèse nan moman y ap mete tèt sou fwontyè nò meksik pataje ak Etazini.
50 ofisyèl enstiti migrasyon meksiken te prezan nan Suchilapan nan Veracruz pou ofri imigran yo viza imanitè pou yo kapab rete Meksik. Men kèk nan imigran yo pa fè otorite yo konfyans.
Yon lòt kote, otorite meksiken yo nan Jesus Carranza anonse yo regilarize estati plis pase 1500 imigran ki te fè pati karavan nan pou yo kapab rete travay Meksik. Hector Martinez, yon ofisyèl enstiti nasyonal meksiken an rejte akizasyon kòm kwa y ap chache ralanti pwogrè karavan nan k ap pran direksyon fwontyè a pandan li mande imigran yo aksepte dokiman pou rete nan peyi a.
Pifò moun ki fè pati karavan nan soti nan Amerik Santral la ak Karayib la, e y ap kouri pou move kondisyon ekonomik ak pwoblèm ensekirite nan peyi yo.