- Ozetazini, pi presizeman nan pati nò Eta Kalifòni, plizyè ekip espesyalis k ap fè rechèch rive jwenn kadav 8 lòt moun ki mouri nan pi gwo dife mawon ki pete nan tout istwa Eta a. Konsa kantite total moun ki pèdi lavi yo nan gwo kokenn dezas natirèl sa a monte rive 56 depi dife yo te kòmanse semèn pase a.
- Kòmandan polis Awondisman Butte la, Kory Honea -ki t ap pale de sitiyasyon an nan jounen mèkredi 14 novanm 2018 la- fè konnen espesyalis yo rive dekouvri 8 kadav yo tou prè yon ti vil ki rele Paradise ki te genyen 27 mil moun kòm popilasyon e ki detrui nèt nan dife a. Kòmandan Honea fè konnen:
- “Sou 56 kadav nou jwenn yo, nou rive idantifye 47 ladan yo. Sepandan n ap tann yon analiz A-D-N pou konfimasyon. Nou espere rezilta analiz la pa p pran twòp tan pou n jwenn li, puiske nou fè vini isit la yon sistèm egzamen A-D-N ki rapid anpil.”
- Prezidan Donald Trump dekrete yon eta-dijans pou tout rejyon nan Kalifoni kote dife ap boule san rete depi kèk jou. Desizyon lidè ameriken an pèmèt popilasyon tout zòn sinistre yo resevwa asistans nan men gouvènman federal la.
Sekouris Trish Moutard, ki abite vil Sacramento, pandan li t ap eseye jwenn plis kadav ansanm avèk chyen li, I.C., nan yon pick-up ke dife te detwi nan vil Paradise, nan Kalifòni, mèkredi 14 novanm 2018 la.
Plizyè milye sapè ponpye fè deplasman an pou yo ale nan Kalifòni epi pote konkou yo nan efò k ap fèt pou etenn dife yo. Youn nan sekouris sa yo se yon kòmandan ponpye nan Kalifoni, Scott Jalbert ki di:
"Mwen gen 31 lane depi m ap egzèse pwofesyon sa a; e dapre sa m konstate depi 5 kan --e menm 7 tan-- chak ane ki pase sitiyasyon an ap vin pi grav. Yon bon pati nan pwoblèm ki poze yo se rezilta yon sechrès pwolonje ki frape Eta a. Sechrès sa a detrui anpil vejetasyon; e lè vejetasyon an mouri, se boule restan plantasyon yo boule. Se sa ki rive la a."
Sitiyasyon kòmandan Jalbert dekri a, mete sou yon tan sèk, plis yon gwo van ki pa sispann soufle, tou sa mete ansanm pou pèmèt seri dife sa yo fè tout destriksyon yo komèt nan Kalifòni yo.