Minis defans ameriken an, Jim Mattis, fè konnen li poko pran yon desizyon sou kantite sòlda li pral deplwaye nan Afganistan apre Prezidan Donald Trump fin anonse Lèzetazini pral mentni angajman li anvè nasyon azi di sid la.
Pandan Mesye Mattis tap pale ak jounalis yo nan Bagdad, kapital Irak la, li di lap fè konsiltasyon ak chèf deta majò entèt lame amerikèn nan pou l ka pran yon desizyon ki baze sou rekòmandasyon li.
Militè ameriken yo nan Afganistan. Foto 10 jen 2017.
Nan yon diskou Prezidan Trump te pwononse nan yon baz militè tou pre Washington lendi 21 out nan aswè, li te di li pa pral revele ki kantite twoup li pral deplwaye nan Afganistan, ou byen pale sou plan li genyen konsènan aktivite militè Lèzetazini.
Olye desa, li pral adopte yon apwòch ki baze sou kondisyon ki egziste sou teren an, yon fason pou l elimine mesye teworis kap opere lòtbò a. Lokatè Mezon Blanch la pa bay okenn lòt detay sou kesyon an.